Бүгін Қазақстанда негізгі ұлттық бірыңғай тестілеуді өткізу басталды, Ал су тасқынынан зардап шеккен өңірлердің (Ақмола, Ақтөбе, Атырау, Батыс Қазақстан, Қостанай, Солтүстік Қазақстан) түлектеріне  ҰБТ-ға тіркеу уақыты 20 мамырға дейін ұзартылды, тестілеу 25 мамырдан 12 шілдеге аралығында өтеді.

Негізгі Ұлттық бірыңғай тестілеудің алғашқы күні ҚР Ғылым және жоғары білім министрі Саясат Нұрбек Астана қаласында Қазақ технология және бизнес университеті базасында орналасқан ҰБТ өткізу пунктіне барды. Ведомство басшысы талапкерлерді аудиторияға кіргізу процесін тексеріп,  талапкерлердің көңіл-күйін сұрап және оларға емтиханды сәтті тапсыруларына тіліек білдірді.

«Тестілеуде барлық талапкерлер негізгі ҰБТ-ны екі рет тапсырып, ең үздік нәтижемен грант конкурсына қатыса алады. Жалпы саны 120 сұрақты құрайтын тестілеуде жоғары 140 ұпайды алу мүмкіндігі барша талапкердің еншісінде болмақ. Біз өз тарапымыздан талапкерлеріміздің тестілеу кезінде жайлы сезіну үшін бар жағадайды жасаймыз», - деп атап өтті Саясат Нұрбек.

Биылдан бастап шекті балл келесідей екеніні естеріңізге сала кетеміз, «Құқық» және «Педагогикалық ғылымдар» білім беру салалары үшін кемінде 75 балл, «Денсаулық сақтау және әлеуметтік қамтамасыз ету (медицина)» кемінде 70 балл, «Ауыл шаруашылығы және биоресурстар», «Ветеринария» кемінде 60 балл (ұлттық жоо үшін); ұлттық жоғары оқу орындарына түсу үшін кемінде 65 балл, басқа жоғары оқу орындарына кемінде 50 балл жинау керек.

Биыл 180 мыңнан астам түлек ҰБТ тапсырады деп жоспарлануда. Өткен жылмен салыстырғанда түлектер саны 9 мыңға көп. Қазіргі уақытта екі мүмкіндікті ескере отырып, 327 мыңнан астам өтінім келіп түсті, оның ішінде биылғы мектеп түлектерінен 291 251 өтініш.

Кестеге сәйкес, бүгін, 16 мамырда республика бойынша 29 пунктте ҰБТ өткізілуде, оған 1858 талапкер қатысуда.

Ақпарат көзі: Қазақстан Республикасы Ғылым және жоғары білім министрлігі