Конституциялық Сотта Төраға Эльвира Азимова мен судья Айжан Жатқанбаеваның Комитет төрағасы Маркус Пентинен бастаған Еуропалық әлеуметтік-экономикалық комитеттің (ЕӘЭК) делегациясымен кездесуі өтті.

Кездесу барысында адамның әлеуметтік және экономикалық құқықтарын қорғаудағы құқық үстемдігінің рөлі, Қазақстандағы конституциялық және сот реформасының негізгі сәттері туралы мәселелер талқыланды. Маркус Пентинен Еуропалық әлеуметтік-экономикалық комитеттің адам құқықтары саласындағы міндеттері, оның ішінде Орталық Азия елдерімен ынтымақтастық ниеті туралы хабардар етті.

Эльвира Азимова Конституциялық Соттың қызметі және азаматтардың әлеуметтік және экономикалық құқықтарына қатысты заңдар мен басқа да нормативтік құқықтық актілерді тексеру нәтижелері бойынша кейбір шешімдер туралы айтты.

Ақпарат үшін: Еуропалық әлеуметтік-экономикалық комитет (ЕӘЭК) әртүрлі экономикалық және әлеуметтік топтардың мүдделерін білдіретін Еуропалық одаққа қатысушы мемлекеттердің 329 мүше-азаматтарынан тұратын консультативтік орган болып табылады. Олардың барлығын Еуропалық Одақ кеңесі Азаматтық қоғам өкілдерінен жалдаушылар, кәсіподақ қызметкерлері және әртүрлі қызығушылық топтарының өкілдері (кәсіби бірлестіктер, фермерлер, экологтар, тұтынушылар және т.б.) ретінде сайлайды. ЕӘЭК 1957 жылы Еуропалық қоғамдастық құру туралы Шартқа сәйкес құрылды. Еуропалық комиссия мен Еуропалық Одақ Кеңесі онымен әлеуметтік және экономикалық мәселелер бойынша кеңесуге міндетті.

Телеграмм КС -

Ақпарат көзі: Қазақстан Республикасының Конституциялық Соты