Қазақстан Республикасы Конституциялық Сотының Төрағасы Эльвира Азимова Венеция комиссиясы хатшылығының заң кеңесшісі Мамука Лонгурашвилимен жұмыс кездесуін өткізді. Қазақстан Республикасы осы комиссияның мүшесі.

Қазіргі уақытта Республика атынан оның құрамына Конституциялық Соттың Төрағасы Эльвира Азимова және Әділет министрі Азамат Есқараев кіреді.

Құқық арқылы демократия үшін Еуропалық Комиссияның мүшелері (Венеция комиссиясы) конституциялық және халықаралық құқықтан сабақ беретін халықаралық дәрежедегі университет профессорлары, адвокаттар, конституциялық және оған теңестірілген соттардың судьялары, ұлттық парламенттердің депутаттары, жоғары лауазымды шенеуніктер болып табылады. Оларды Венеция комиссиясына мүше мемлекеттер төрт жылдық мерзімге тағайындайды. Комиссияның 61 мүшесі бар, оның 46-сы Еуропа Кеңесіне мүше мемлекеттер.

Венеция комиссиясы жанындағы бақылаушы мәртебесіне келесі мемлекеттер ие: Аргентина, Қасиетті Тақ, Уругвай және Жапония. Оңтүстік Африка мен Палестина ұлттық автономиясы бақылаушы мәртебесіне ұқсас ынтымақтастық серіктесінің арнайы мәртебесіне ие.

Еуропалық комиссия, ЕҚЫҰ Демократиялық институттар және Адам құқықтары бюросы (ЕҚЫҰ/ДИАҚБ) және Америка мемлекеттерінің ұйымы Венеция комиссиясының пленарлық отырыстарына үнемі қатысады.

Кездесу барысында Эльвира Азимова және Мамука Лонгурашвили Қазақстан Республикасының Венеция комиссиясына қатысуы, оның конституциялық сотпен өзара іс-қимыл бағыты мәселелерін талқылады.

Сонымен қатар, Венеция комиссиясы 120-дан астам мемлекеттің конституциялық соттары мен оған теңестірілген органдарын біріктіретін конституциялық сот төрелігі жөніндегі дүниежүзілік конференция хатшылығының функцияларын орындайды.

Кездесу барысында Эльвира Азимова Қазақстан Республикасы Конституциялық Сотының 16 нормативтік қаулысын CODICES электрондық ақпараттық-анықтамалық базасына енгізгені үшін Венеция комиссиясына алғысын білдірді. Бұл база жүзден астам соттың 10 мыңнан астам шешімінен, Конституциялық Соттардың және Венеция комиссиясына мүше мемлекеттердің баламалы институттарының қызметін реттейтін Конституция мен заңдардың мәтіндерінен тұрады.

Венеция комиссиясына қатысу шеңберінде Конституциялық Сот әріптестерімен ұлттық заңнамалық актілермен және құқықтық ақпаратпен белсенді алмасады. Сұрау салулар мен оларға ден қоюдың бұл жүйесі Қазақстанның және басқа мемлекеттердің құқықтық саясаты мен заңнамасы туралы, Конституциялық Соттардың шешімдері және Венеция комиссиясының заң жобаларына немесе қолданыстағы заңдарға қатысты халықаралық стандарттарды имплементациялау және ең үздік құқық қолдану практикаларын қарау бөлігінде мүше мемлекеттердің сұрау салулары бойынша тәуелсіз сараптамалық қызмет шеңберінде құқықтық қорытындылары туралы жедел ақпарат алу мүмкіндігін білдіреді.

Ақпарат көзі: Қазақстан Республикасының Конституциялық Соты