Конституциялық Сот 2015 жылғы 29 қазандағы Кәсіпкерлік кодекстің 31-бабының 1, 2-тармақтарының және 32-бабының 4-тармағының Конституцияға сәйкестігін тексеру туралы азаматтың өтінішін алдын ала қарады.

Өтініш материалдарына сәйкес кәсіпкерлік қызметпен айналысқан жұбайы қайтыс болғаннан кейін өтініш субъектісі мұрагерлік мүліктің 1/3 бөлігіне құқылы екені айтылған. Белгілі бір үлеспен келіспеуіне байланысты ол нотариустың аталған үлесті мұрагерлік туралы куәлігін жарамсыз деп тануды талап етіп, сотқа талап арыз берді. Өтініш берушінің пікірінше, жеке кәсіпкерлік қызмет шеңберінде сатып алынған мүлік олардың ортақ бірлескен меншігі болып табылады және сәйкесінше жұбайы қайтыс болғаннан кейін үлесті анықтау мәселесі басқа жолмен шешілуі тиіс.

 Өтінішті зерделегеннен кейін Конституциялық Сот өтініш субъектісінің заң бойынша мұрагерлік құқығы туралы куәліктерді жарамсыз деп тану туралы бас тарту бөлігінде сот актілерімен іс жүзінде келіспейтіндігіне назар аударды. Басқаша айтқанда, өтініш берушінің наразылығы құқық қолдану практикасымен байланысты, бірақ даулы нормативтік құқықтық актілері Конституцияға қайшы келмейді. Кәсіпкерлік кодекстің 31-бабының 1 және 2-тармақтары меншік режимін айқындамайды және оған қоса соттан тыс тәртіппен меншік құқығынан айыруды регламенттемейді, яғни субъект көрсеткен конституциялық құқықтарды қозғамайды.

Өтініш субъектісі сондай-ақ «Конституциялық Сот туралы» Конституциялық заңның 45-бабы 2-тармағының 1) тармақшасында белгіленген өтінішті қарауға жол беру шарттарына сәйкес келмейтін, оған қатысты сот қолданбаған Кәсіпкерлік кодекстің 32-бабының 4-тармағына дау айтады.

Көрсетілген мән-жайларды ескере отырып, Конституциялық Сот өтініш берушіге қаралуы соттың құзыретіне кіретін практикалық сипаттағы мәселелерді тексеруден бас тартатынын хабарлады.

Ақпарат көзі: Қазақстан Республикасының Конституциялық Соты