Конституциялық Сотта ЕҚЫҰ-ның Астанадағы бағдарламалар кеңсесі мен «Құқықтық медиа-орталық» үкіметтік емес ұйымының қолдауымен Конституциялық Сот және АҚЖЕС судьяларының кездесуі, сондай-ақ Конституциялық Сот, Парламент Сенаты мен Мәжілісі, Бас прокуратура, Әділет министрлігі және Адам құқықтары жөніндегі ұлттық орталық аппараттарының қызметкерлеріне арналған семинар өтті.

Шаралар Еуропа елдерінде және Адам құқықтары жөніндегі еуропалық сотта конституциялық бақылау тәжірибесі туралы практикалық білім алу мақсатында ұйымдастырылды.

Шаралардың жетекші спикері Адам құқықтары жөніндегі еуропалық соттың судьясы және Еуропа Кеңесінің Венеция комиссиясының мүшесі Лятиф Гусейнов болды. Ол өз сөзінде адам құқықтарын қорғаудың еуропалық принциптеріне, ақпаратқа қол жеткізуге және судьялардың бейтараптық принципіне назар аудара отырып, АҚЖЕС сот практикасының ерекшеліктерін атап өтті.

Конституциялық Соттың Төрағасы Эльвира Азимова Конституциялық Соттың адам құқықтарын қорғау тетігін нығайту және құқық үстемдігін қамтамасыз ету саласындағы қызметін қолдағаны үшін ЕҚЫҰ-ның Астанадағы бағдарламалар кеңсесіне алғысын білдірді.

ЕҚЫҰ-ның Астанадағы бағдарламалар кеңсесінің басшысы доктор Фолькер Фробарт қазақстандық конституциялық бақылау органының адам құқықтары мен құқық үстемдігінің халықаралық стандарттарына бейілділігін жоғары бағалады.

Ақпарат көзі: Қазақстан Республикасының Конституциялық Соты