ҚР Қаржы министрі Мәди Такиев Дүниежүзілік банк тобының басқарушы және қаржы директоры Аншула Кант, сондай-ақ Қазақстандағы ДБ-тің тұрақты өкілі Андрей Михнев пен ДБ-тің аға операциялық директоры Янина Ермаковамен кездесіп, өзара тиімді әріптестікті нығайтудың жолдарын талқылады.

Мәди Төкешұлы Қазақстан мен Дүниежүзілік банктің қаржы тобы арасында нәтижелі және табысты ынтымақтастықтың қалыптасқанын айта келе екіжақты байланысты жоғары бағалады. Сондай-ақ қаржы институтының еліміздегі инфрақұрылымдық жобаларды іске асыруға қосқан оң үлесін атап өтіп, қолдау көрсеткені үшін алғысын жеткізді.

Ведомство басшысы айтқандай, өзара әріптестіктің 30 жылдан артық уақыт кезеңінде 8 млрд доллардан астам қаражатқа 48 бірлескен жоба сәтті жүзеге асырылды. Қазір белсенді портфельге 10 инвестициялық операция кіреді, оның ішінде trust (сенімгерлік) қорынан қаржыландырылатын үш жоба бар. Жалпы резервтелген ақшаның таза көлемі 4,081 млрд доллар. Оның ішінде 3,1 млрд доллары (76%) бүгінде игерілген.

Бұл орайда Дүниежүзілік банкпен арадағы әріптестік неғұрлым инклюзивті және орнықты өсімге қол жеткізу үшін Қазақстанда жүргізіліп жатқан реформаларды қолдауға бағытталғанын айта кеткен орынды.

Кездесудің барысында Аншула ханым Дүниежүзілік банк тобының жаңа инновациялық қаржы құралдарын таныстырды.

Тұтастай алғанда, тараптар жемісті қарым-қатынасты одан әрі нығайтуға мүдделі екендерін атап өтті.

Ақпарат көзі: Министерство финансов Республики Казахстан