Қазақстан Республикасындағы Адам құқықтары жөніндегі уәкіл Артур Ластаев Еуропалық Одақтың Орталық Азия бойынша арнайы өкілі Тери Хакаламен кездесті.Кездесу барысында Артур Ластаев Адам құқықтары жөніндегі уәкіл кеңсесінің қызметіне тоқталып, бүгінде Қазақстанның әр өңірінде Уәкілдің өкілдері жұмыс істейтінін түсіндірді. Сонымен қатар, Уәкіл жанынан Үйлестіру-сарапшылық кеңес жұмыс істейді, онда адам құқықтарын қорғау саласындағы өзекті мәселелерді талқылау үшін тұрақты негізде отырыстар өткізіледі.Сондай-ақ, ол халықтың институтқа деген сенім деңгейінің артып келе жатқанын, бұл келіп түскен өтініштердің санынан көрінетінін айтты. 2024 жылдың 6 айында Уәкіл мен оның өкілдеріне 3 мыңнан астам шағым түсті, бұл өткен жылдың сәйкес кезеңімен салыстырғанда 13%-ға жоғары.Жиында Артур Ластаев биыл Қазақстанда әйелдердің құқықтары мен балалардың қауіпсіздігін қорғауға бағытталған заң қабылданғанына тоқталып, тұрмыстық зорлық-зомбылық үшін жауапкершілікті күшейту және зардап шеккендерге қолдау көрсетудің тиімді тетіктерін құру маңыздылығын атап өтті.Адам құқықтары жөніндегі уәкіл Балалар құқықтары жөніндегі уәкіл Динара Зәкиевамен балаларды қудалаудың алдын алу және оған қарсы күрес жөніндегі бірлескен бастама туралы әңгімеледі. Ол мұндай құқық бұзушылық үшін жауапкершілікті қарастыратын норманы заң жүзінде бекіту керектігін баса айтты.Өз кезегінде Тери Хакала Қазақстан ЕО үшін стратегиялық серіктес екенін және әйелдер мен балалардың құқықтарын қорғау туралы заңның қабылдануын құптайтынын, өйткені бұл адам құқықтарын нығайту, әлеуметтік саланы арттыру тұрғысынан ел үшін үлкен прогресс екенін жеткізді. Әділеттілік және халықтың осал санаттарын қорғау саласындағы халықаралық стандарттарды сақтау да аса маңызды екенін мәлімдеді.Кездесу қорытындысы бойынша тараптар өзара мүдделі салалардағы ынтымақтастықты одан әрі дамыту туралы келісті.

Ақпарат көзі: Қазақстан Республикасындағы Адам құқықтары жөніндегі уәкіл