Біріккен Ұлттар Ұйымы Даму бағдарламасының кеңсесі 2024 жылғы 4 маусым мен 14 маусым аралығында Қазақстандағы БҰҰ ДБ қызметіне тәуелсіз бағалау жүргізді. Осы шара аясында Астанаға сарапшылар тобы келді. Қазақстан Республикасындағы Адам құқықтары жөніндегі уәкіл кеңсесінің өкілі Салтанат Тұрсынбекова сарапшылардың бірі Бунафши Гулаковамен кездесті.

Кездесу барысында Салтанат Тұрсынбекова Қазақстандағы БҰҰ Даму бағдарламасымен ынтымақтастық және өзара іс-қимыл туралы егжей-тегжейлі айтып, бірлесіп қолға алынған «Азаптаулардың алдын алу үшін Ұлттық алдын алу тетігін күшейту» жобасы, сондай-ақ қазіргі уақытта жүзеге асырылып жатқан «Ұлттық алдын алу тетігін нығайту» жобасы туралы ақпаратпен бөлісті.

Сонымен қатар, Уәкіл кеңсесінің өкілі басқа да бірлескен іс-шаралар туралы, соның ішінде құқық қорғау қызметін одан әрі жетілдіруге, АҚЖУ өкілдері мен ҰАТ қатысушыларының білімі мен дағдыларын арттыруға бағытталған тренингтер туралы баяндады.

Тағы айта кетерлігі, Адам құқықтары жөніндегі уәкіл кеңсесі БҰҰ ДБ-мен бірге халықты құқықтық оқу-ағарту бойынша іс-шараларды жүзеге асырады.

Әңгімелесу барысында Уәкіл кеңсесінің қызметі де талқыланды.

Кездесу соңында тараптар адамдар мен азаматтардың құқықтары мен негізгі бостандықтарын сақтауды көздейтін құқықтық мәдениетті одан әрі дамытуға бағытталған жекелеген жобалар әзірлеп, балалар мен ересектерді құқықтық ағарту бойынша іс-шаралар өткізу туралы пікір алмасты.

Ақпарат көзі: Қазақстан Республикасындағы Адам құқықтары жөніндегі уәкіл