Мемлекет басшысы Қасым-Жомарт Тоқаевтың Қазақстанның мемлекеттік қызметін дамытудың 2024-2029 жылдарға арналған тұжырымдамасын бекітуі аясында ҚР Әділет министрлігінде мемлекеттік қызметшілердің адамгершілік-этикалық бейнесін қалыптастыратын құндылықтар жүйесін жетілдіру мәселелерін талқылауға арналған семинар өтті.

Әділет министрлігі Аппарат басшысы Сандуғаш Ерсеитованың төрағалығымен өткен іс-шара мемлекеттік қызмет және этика саласындағы негізгі мамандар мен сарапшыларды жинады. Спикерлер ретінде ҚР Мемлекеттік қызмет істері агенттігінің Әдеп жөніндегі уәкілі Гүлжахан Үсенова, ҚР Әділет министрлігінің Әдеп жөніндегі уәкілі Алма Сыдықова және ҚР Мемлекеттік қызмет істері Агенттігінің Мемлекеттік қызмет саласындағы бақылау департаменті әдеп құқық бұзушылықтарының алдын алу басқармасының бас сарапшысы Рамазан Әзіретқұлов баяндама жасады.

Кеңес барысында “Мемлекеттік қызметтегі мінсіз әдеп пен адалдық қағидаттары", “Корпоративтік мәдениетті қалыптастырудағы көшбасшының рөлі" және "Мемлекеттік қызметшілердің әдеп нормаларын сақтау мәселелері" тақырыптарында баяндамалар тыңдалды.

Спикерлер мемлекеттік органдарда корпоративтік мәдениетті қалыптастыру мен нығайтудың маңыздылығын, сондай-ақ кәсіби қызметте әдеп пен адалдық нормаларын қатаң сақтау қажеттігін атап өтті. Мемлекеттік қызметті дамыту тұжырымдамасына негізделген жаңа нормативтік құжаттардың ережелері этикалық стандарттарды жақсартуға және қоғамның мемлекеттік қызметке деген сенімін арттыруға бағытталған.

Ақпарат көзі: Министерство юстиции Республики Казахстан