ҚР ҒЫЛЫМ ЖӘНЕ ЖОҒАРЫ БІЛІМ МИНИСТРЛІГІ ЖӘНЕ QAZAQGAZ КАДРЛАРДЫ ДАЯРЛАУ МЕН ИННОВАЦИЯЛЫҚ ЖОБАЛАРДЫ ТАЛҚЫЛАДЫ

  ҚР Ғылым және жоғары білім министрлігінде министр Саясат Нұрбектің «QazaqGaz Ғылыми-техникалық орталығының» бас директоры Мейір Шералымен кездесуі өтті. Кездесу барысында газ саласындағы білікті кадрларды даярлау және жоғары оқу орындарымен ынтымақтастық, сондай-ақ ғылыми институттармен, зертханалармен және университеттермен бірлесіп, ғылыми-зерттеу жұмыстарын іске асыру мәселелері талқыланды.

  ҚР Ғылым және жоғары білім министрі Саясат Нұрбек министрлік ғылымды дамыту және коммерцияландыру, сондай-ақ Мемлекет басшысының тапсырмаларын іске асыру жөніндегі негізгі міндеттер шеңберінде жоспарлы жұмыс жүргізіп жатқанын атап өтті. Нақтырақ айтсақ, ол «Ғылым және технологиялық саясат туралы» жаңа заң жобасы ғылыми стартаптар құруға мүмкіндік беретініне тоқталды. Бұл заң жобасы университеттерге, оқытушылар құрамына және ғалымдарға Ғылым Қорының қолдауымен және жеке инвестицияларды тарту арқылы өздерінің стартаптарын құруға мүмкіндік беретін жүйелік негіз жасайды.

  «Біз еліміздің жоғары оқу орындары ғылыми орталықтармен ынтымақтастыққа ашық болуы үшін белсенді жұмыс жүргізіп жатырмыз. Қазіргі уақытта елімізде білім және ғылым деңгейін арттыру үшін ғылыми мекемелермен тығыз байланыста жұмыс істейтін шетелдік жоғары оқу орындарының 25 филиалы ашылды», - деп атап өтті Саясат Нұрбек.

  Бұған дейін ҒТО Satbayev University және ҚБТУ-мен өзара түсіністік туралы меморандумдарға қол қойды, оның шеңберінде жас кадрларды даярлау бойынша жұмыстар жүргізілуде, студенттермен бірқатар ынталандырушы кездесулер өткізілді, өндірістерге көшпелі экскурсиялар ұйымдастырылды, сондай-ақ Satbayev University базасында мамандандырылған аудитория ашу жоспарлануда. Айта кету керек, мұнай-газ мамандықтарының 12 студентіне талантты және табысты студенттерді ынталандыру бағдарламасы аясында атаулы стипендиялар бөлінді.

  «QazaqGaz Ғылыми-техникалық орталығы еліміздің жетекші техникалық және зерттеу жоғары оқу орындарын ынтымақтастыққа шақырады, жоғары оқу орындарының құзыреттерін дамытып, қолданыстағы оқу-өндірістік комбинаттарының базасында газ саласының болашақ қызметкерлерін, сондай-ақ ғылыми-зерттеу қызметінің нәтижелерін өндірістік процестерге белсенді ілгерілетуді жоспарлап отыр», - деді Ғылыми-техникалық орталықтың бас директоры.

  Кездесу аясында Қазақстанның энергетикалық қауіпсіздігін қамтамасыз ету үшін маңызды бағыт болып табылатын жерасты газ қоймаларын құру бойынша ауқымды жобалар талқыланды.

  Сондай-ақ министр QazaqGaz-қа Huawei ICT академиясының үлгісі бойынша еліміздің оқу орындарында QazaqGaz академиясын ашу мүмкіндігін қарастыруды ұсынды. Бұл ұсыныс цифрлық экономикаға бейімделген кадрлардың әлеуетін дамытуға бағытталған. Осыған байланысты министрлікте Google, Nvidia, Coursera, 01 Edu System және Huawei сияқты трансұлттық компаниялармен ынтымақтастық орнатылған. Бұл серіктестіктер озық технологиялар мен білім беру бағдарламаларын енгізуге көмектеседі, бұл газ саласы мен жалпы цифрлық экономика үшін жоғары білікті мамандарды даярлаудағы маңызды қадам екені айтылды.

видеоматериал

Ақпарат көзі: Қазақстан Республикасы Ғылым және жоғары білім министрлігі