РЕСПУБЛИКАЛЫҚ СТУДЕНТТІК КЕҢЕСТІҢ IV ОТЫРЫСЫ ӨТТІ

  Кеше Л.Гумилев атындағы Еуразия ұлттық университетінде министр Саясат Нұрбектің қатысуымен ҚР Ғылым және жоғары білім министрлігі жанындағы Республикалық студенттік кеңестің IV отырысы өтті.

  Студенттік кеңестің міндеттері жоғары және жоғары оқу орнынан кейінгі білім беру саласындағы мәселелер бойынша білім алушылардың мүдделерін білдіру және шешімдерді талқылау, қабылдау кезінде олардың пікірлерін есепке алу, Министрліктің студент жастармен өзара іс-қимылын дамыту болып саналады.

  Шараға өңірлік жоғары оқу орындарынан келген 80-ге жуық белсенді студенттер, өзін-өзі басқару ұйымдарының басшылары мен студенттік омбудсмендер қатысты.

  Министр кеңеске қатысушыларға жаңадан тағайындалған жастар саясаты жөніндегі кеңесшісі Тоқтар Болысов пен республикалық студенттік омбудсмен Ұлан Наукенді таныстырды. Сондай-ақ бұл бағыттағы қызметін аяқтаған Айсұлу Ерниязоваға алғыс хат табыстап, жастар саясаты мен студенттік қоғамдастықпен байланыс орнатуда атқарған жемісті жұмысын атап өтті.

  Саясат Нұрбек өз сөзінде студенттік қоғамдастыққа оқу орындарының өміріне белсенді қатысып жатқаны үшін алғысын білдірді. Студенттік омбудсмендер мен белсенді жастарға көлемді баяндама жасап, ғылым мен жоғары білім саласындағы соңғы жетістіктермен бөлісті.

  «Студенттік кеңестер оқу орындарындағы демократиялық процестерді қалыптастыруда маңызды рөл атқарады, пікір білдіруге, маңызды мәселелерді талқылауға және ұжымдық шешімдер қабылдауға ықпал етеді. Алдымызда жаңа оқу жылы келе жатыр, осы мақсатта студент жастардың тыныс-тіршілігінің маңызды мәселелерін шешуде, олардың құқығын қорғау мен әлеуметтік бастамаларды қолдауда және іске асыруда белсенділік танытуларыңыз қажет», - деді министр.

  Кеңес шеңберінде өңірлердің белсенді студенттерімен брейн-шторминг жасалып, Студенттік өзін-өзі басқару ұйымдарының 2024-2025 ж. жұмыс жоспары талқыланды.

  Кеңестің негізі отырысынан кейін «Quiz Sтуденттер алаңы» интеллектуалды ойыны өтіп, онда студент жастардың интеллектуалды қабілеттерін дамыту мен достық қарым-қатынасты нығайту шыңдалды.

Ақпарат көзі: Қазақстан Республикасы Ғылым және жоғары білім министрлігі