Абай облысының дін істері басқармасы Рухани келісім күніне орай «Толеранттылық – бейбітшілік пен келісімнің іргетасы» тақырыбында форум ұйымдастырды.

Форумда облыс әкімінің орынбасары Жасұлан Сәрсебаев сөз сөйлеп, рухани келісімнің еліміздегі татулық пен бірлікте алар орны ерекше екендігін атап өтті. Сонымен қатар, конфессияаралық келісімді нығайтуға қосқан елеулі үлесі үшін бірнеше адамға облыс әкімінің атынан Алғыс хаттар табыстады.

Шараға діни бірлестіктердің, ішкі саясат бөлімдерінің өкілдері мен ақпараттық-түсіндіру тобының мүшелері қатысып, форумның конфессияаралық қарым-қатынасты нығайтуға ықпалы зор екендігі жайлы пікір алмасты.

Форум ақпараттық-түсіндіру тобының мүшелеріне және ішкі саясат бөлімдерінің мамандарына арналған оқыту семинарлары, діни бірлестіктер басшылары арасында интеллектуалды ойындардың ұйымдастырылуымен жалғасты. Сондай-ақ, діни бірлестіктер басшылары Шәкәрім университетінің ауласына 10 түп шырша көшетін отырғызды.

Жалпы, бүгінгі таңда облыста 7 конфессияны білдіретін 187 діни бірлестік тіркелген.

Ақпарат көзі: Абай облысының әкімдігі