2024 жылғы 23 шілдеде Адам құқықтары жөніндегі уәкіл Артур Ластаев ҚР ІІМ ҚАЖК №18 мекемесінде болды. Бұл - Шығыс Қазақстан облысының Шемонаиха ауданында орналасқан қауіпсіздігі барынша жоғары мекеме.

Омбудсмен колониядағы сотталғандардың жағдайымен танысып, мекеменің ең төменгі халықаралық стандарттарға сәйкестігін тексерді. Артур Ластаев пен оның кеңсесінің өкілдері асхана, тұрғын үйлер, медициналық пункт, өндірістік нысандарды аралап шықты.Жеке әңгімелесу барысында Адам құқықтары жөніндегі уәкіл сотталғандардың қамауда ұстау жағдайлары туралы пікірін біліп, сұрақтарына жауап берді.

Әңгімелесу кезінде сотталғандарды жұмыспен қамту мәселесі де сөз болды. Қазіргі таңда колонияда ағаш, металл және жиһаз жасаумен айналысатын 7 кәсіпорын жұмыс істейді. Сонымен қатар, 2 жылыжай мен техникалық қызмет көрсету станциясы бар. Барлығы 230 сотталған азамат жұмысқа орналастырылған. Бұл ретте жұмыс орындарына деген сұраныс ұсыныстан қарағанда айтарлықтай көп.

«Түзеу мекемелерінде кәсіпкерлікті дамыту үшін кәсіпкерлерді тарту мәселесі өзектілігін жоғалтпай тұр. Бұл сұрақты мен барған барлық дерлік мекеме басшылары көтереді. Біз, әрине, бұл мәселені шешу үшін жұмыс істеуіміз керек және мен кәсіпкерлерді осындай орындарда кәсіпорындар ашудан қорықпауға шақырамын, өйткені тәжірибе көрсеткендей, мұнда адамдар қалай жұмыс істеу керектігін біледі және ең бастысы жұмыс жасауға деген ынталары жоғары», - деді Адам құқықтары жөніндегі уәкіл Артур Ластаев.

Уәкіл сотталғандарды жеке қабылдап, олардың өтініштерін тыңдады, сондай-ақ сотталғандардың шартты түрде мерзімінен бұрын босату және жазаны жеңілдету институтын жетілдіру бойынша қабылданып жатқан шаралар туралы сұрақтарына жауап берді.

Еске сала кетейік, бұған дейін Артур Ластаев Өскемендегі No22 мекемеде болды. Жалпы, жыл басынан бері Уәкіл сотталғандардың құқықтары мен қамауда ұстау жағдайларының сақталуын бақылау мақсатында 7 түзеу мекемесін аралады.

Ақпарат көзі: Қазақстан Республикасындағы Адам құқықтары жөніндегі уәкіл