Бүгін ҚР Стратегиялық жоспарлау және реформалар агенттігінде Мемлекеттік басқару академиясының магистранттары үшін дәріс өткізілді.

 «Мемлекеттік басқару жүйесіндегі реформалар зерттеулерге негізделуі керек, ал олар өз кезегінде деректермен қамтамасыз етіледі. Бұл тұрғыда біздің Агенттікте сол деректердің бірегей көзі ретінде Ұлттық статистика бюросы бар. Бірақ біз сондай-ақ бүкіл мемлекеттік аппаратта шешім қабылдау мәдениетінің қалыптасқанын қалаймыз. Сол себепті біз мемлекеттік статистика реформасын жүргізу үстіндеміз, оның нәтижелерімен сіздермен бүгінгі дәрісте бөлісетін боламыз», - деп атап өтті Агенттік Төрағасы Жандос Шаймарданов.

Қазіргі уақытта Агенттік бастапқы статистикалық ақпарат пен әкімшілік мәліметтермен қатар баламалы дерек көздерін біріктіріп, қолдануда. Мысалы, мобильді деректер негізінде көші-қон және туристік белсенділікті бақылап, банк операциялары бойынша азаматтардың өмір сүру деңгейін бағалайды, спутниктік суреттер бойынша аудандардың көлемін және ауыл шаруашылығы дақылдарының өнім деңгейін көреді, фискалдық чектер деректерінің арқасында баға мониторингін жүргізеді.

Агенттік басшысы атап өткендей, деректердің сапасына ерекше көңіл бөлінеді. Ол әкімшілік дереккөздердегі дұрыс емес деректерді анықтайтын және белгілі бір ақпараттық жүйелерді одан әрі дамыту бойынша жүйелік ұсыныстар енгізетін жаңадан құрылған дата-бақылаушылар институтының жұмысының мысалдарын келтірді.

«Мемлекеттік органдардың қызметкерлері мен деректерді пайдаланушылардың талдамалық әлеуетін нығайту үшін біз халықаралық ұйымдармен бірлесіп Data Literacy бағдарламасын әзірледік. Бұл статистика және деректерді талдау саласындағы білімдерін тереңдетуге ниет білдірушілер үшін қолжетімді ашық онлайн платформа», - деді Ж.Шаймарданов.

Іс-шара соңында сұрақтар сессиясы өткізілді, онда дәрістің барлық тыңдаушылары толыққанды жауаптар алды.

Ақпарат көзі: Қазақстан Республикасының Стратегиялық жоспарлау және реформалар агенттігі