Адам құқықтары жөніндегі уәкілдің Шымкент қаласы бойынша өкіліне ер адам хабарласты. Ол 2015 жылы жеке куәлігін алғанын, бірақ белгісіз себептермен мемлекеттік электронды деректер базасында өтініш берушінің суреті жоқ екенін, бұл жеке басын сәйкестендіруге кедергі келтіретінін айтты. Осыған байланысты өтініш беруші ЭЦҚ және басқа да мемлекеттік қызметтерді онлайн режимінде ала алмай жүр.Жас жігіт халыққа қызмет көрсету орталығына және Көші-қон қызметі департаментіне қатені жоюды сұрап хабарласқан, бірақ электронды базадағы қателіктен бұл мәселені шешуге ешкім көмектесе алмаған. Кейін арызданушы ҚР Ішкі істер министрлігіне жүгінуге мәжбүр болған, онда оның ЖСН деректер базасында жоқ екені белгілі болды.Өтініш беруші Уәкіл өкілінен оның азаматтық құқықтарын қалпына келтіруге және мәселенің шешімін табуға көмектесуін сұрады.АҚЖУ өкілі ҚР Цифрлық даму, инновациялар және аэроғарыш өнеркәсібі министрлігіне, ҚР Ішкі істер министрлігіне, сондай-ақ Шымкент қалалық Әділет департаментіне ұсыныстар жолдады.Сонымен бірге, Шымкент қалалық Әділет департаментінің басшылығымен кездесу өткізіп, ЦДИАӨМ қызметкерлерімен және көші-қон полициясымен байланыста болды.Өтінішті қарау нәтижелері бойынша ҚР Цифрлық даму министрлігі мен Ішкі істер министрлігінен жауап келіп түсті. Қазіргі уақытта өтініш берушінің деректері біріктірілген мемлекеттік деректер базасында және басқа да жүйелерде қалпына келтірілді, осылайша оның азаматтық құқықтары қорғалды.

Ақпарат көзі: Қазақстан Республикасындағы Адам құқықтары жөніндегі уәкіл