Үстіміздегі жылдың маусым айында Адам құқықтары жөніндегі уәкілдің Шығыс Қазақстан облысы бойынша өкіліне «Ана үйі» ресурстық орталығының аймақтық маманы кәмелетке толмаған қызды ұрып-соғу фактісіне қатысты оның құқығын қорғауға көмектесу туралы хабарлама алған.

Бұл факт Адам құқықтары жөніндегі уәкілдің Шығыс Қазақстан облысы бойынша өкілінің бастамасымен Кәмелетке толмағандар істері және олардың құқықтарын қорғау комиссиясының отырысында талқылауға шығарылды. Сондай-ақ, оған ШҚО Бала құқықтары жөніндегі уәкілі, қорғаншылық және қамқоршылық органдары, кәмелетке толмағандар ісі жөніндегі инспекцияның, білім беру жүйесінің өкілдері, психологтар қатысты.

Кездесу барысында қыздың үйінен бірнеше рет қашып кеткені, оралғаннан кейін физикалық зорлық-зомбылық іздері, сондай-ақ тері аурулары табылғаны белгілі болды.

Жасөспірімнің физикалық және психологиялық жағдайы қанағаттанарлықсыз деп бағаланды.Өскемен қаласының кәмелетке толмағандар істері жөніндегі комиссиясы қалалық қорғаншылық және қамқоршылық органдарына өз міндеттерін орындамағаны үшін қорғаншыны қорғаншылық құқығынан айыру мәселесін қарауды ұсынды. Сонымен қатар, Кәмелетке толмағандарды бейімдеу орталығының басшылығына кәмелетке толмаған балаға шабуыл жасау фактісі бойынша арыз жазу ұсынылды. Алайда, бұл уәкілетті органдар баланы ұрып-соғудың мән-жайын анықтау шараларын қолданбай, зорлық-зомбылыққа ұшырауы мүмкін отбасына қайтарған.

Осы жылдың тамыз айында Уәкілдің өкілі Шығыс Қазақстан облысы бойынша Бала құқықтары жөніндегі уәкілмен бірлесіп, мемлекеттік органдармен өзара іс-қимыл аясында ШҚО прокурорына және ШҚО ІІД бастығына кәмелетке толмаған баланың денсаулығына зиян келтіру фактісі бойынша қылмыстық іс қозғау және объективті тергеу жүргізу, оның ішінде бала құқықтарының ықтимал бұзылуы фактісі бойынша мәселені қарау туралы ұсыныс жолдады. Сондай-ақ қорғаншылық және қамқоршылық органдарының әрекеттерінің заңдылығын тексеру қажеттігі айтылды.

Қабылданған іс-шаралар нәтижесінде Өскемен қаласы ІІБ Сол жағалаудағы полиция бөлімімен Қазақстан Республикасы Қылмыстық кодексінің 109-1-бабының 1-бөлігімен сотқа дейінгі тергеп-тексеру жұмыстары жүргізіліп, кәмелетке толмаған баланың дене жарақатын алуының объективтік фактілері анықталды. Қазіргі уақытта қажетті тергеу амалдары жүргізілуде.

Ақпарат көзі: Қазақстан Республикасындағы Адам құқықтары жөніндегі уәкіл