Әскери дискурстың практикалық бөлігі көркем фильм түсіру үшін көшпенділер қаласы арнайы салынған Іле өзенінің бассейнінде өтті.

Дискурстың екінші күні іс-шараны ұйымдастырған Арнайы операциялар күштері 20030 әскери бөлімінің қолбасшылығы журналистердің теориялық блокты қаншалықты игергенін тексерді.

Дискурсқа қатысушылар межелі жерге жаяу жетті. Осы жолда нұсқаушылар бірқатар сынақтар ұйымдастырды. Топтың үйлесімді қимылы жергілікті жерді бағдарлай білуі және психологиялық тұрақтылық қабілеті тексерілді.

Жол бойында олар жараланған адамға кезікті. Ол «миналанғандықтан», журналистер жағдайдан шығудың жолын таба алмай қиналды. Сонымен бірге қауіпсіз жасырылған азық-түлікті іздеу де олар үшін сынақ болды. «Спутник Қазақстан» басылымының тілшісі Александр Мирогловтың тапқырлығының арқасында топ бұл тапсырманы тез орындады.

Жеке рационның дәмін тату кезінде команда мүшелерінің бірін «террористер» ұрлап кеткені анықталды. Оған Atameken Business телеарнасының тілшісі Ержан Өтепқалиев бастаған бірнеше адам көмекке кетті. Еріктілер ұйымшылдық танытып, операторды «тұтқыннан» шығарып алды.

Бірнеше шақырымнан кейін топ торуылға тап болды. Атыс дауысы, тұтқиылдан тап беріп, тонау және жеке басын анықтауды ешкім күткен жоқ. Жігіттер мен қыздардың басына жарық өткізбейтін қап кигізіп, қарша бораған оқтың астымен «террористердің» ұясына алып келді. Ту сырттарынан мылтықтың дүмбісімен соққы алған журналистерді қолдарын байлап, Камазға тиеді.

– Психологиялық шабуыл – бұл айтарлықтай арандатушылық. Біздің мақсатымыз – адамның күшті әрі әлсіз жақтарын анықтау. Топтағылардың бірі тұтқындау кезінде бірден сыр берсе, енді бірі соңына дейін бәрін ойын ретінде қабылдады, – деп түсіндірді Әскери дискурс нұсқаушысы Руслан Бек.

Көшпенділер қаласында топ «азаптауға» ұшырады. Журналистердің әскери қақтығыс аймағында болу мақсаты, еріп жүрушілердің аты-жөні, әскери іс-қимылдарды түсіруге рұқсатының бар-жоғын анықталды.

Журналистердің пікірінше, бәрі жоғары деңгейде өтті. «Спутник Қазақстан» агенттігінің фототілшісі Ертай Сарбасов дискурсқа алғаш рет қатысып отыр.

– Мұндай іс-шаралар біздің дайындығымыз үшін қажет деп санаймын. Басында менде үрей болды. Содан кейін дәрменсіздік сезімі пайда болды. Бірақ мен бейсаналы түрде ешкім бізге зиян тигізбейтінін түсіндім және сынақтың соңына дейін шыдап бақтым, – деді Ертай Сарбасов.

«Журналистер қайтадан дискурсқа қатысуға дайын ба?» деген сұраққа барлығы бірауыздан: «Иә!» деп жауап берді. Бұл келесі жылы да Қорғаныс министрлігі өзін экстремалды әскери журналистикада сынап көруге дайын адамдарды қайтадан жинайды деген сөз.

– Қазіргі заманғы қарулы қақтығыстарда ақпараттық соғыс алғашқы орынға шықты. Көбінесе ыстық нүктелерде жұмыс істейтін журналистер басты нысанаға айналады. Сондықтан әскери дискурста біз оларға моральдық-психологиялық дайындықтың қажетті деңгейін беруге, экстремалды жағдайларда сауатты әрекет етуге және тиімді жұмыс істеуге үйретуге тырысамыз, – деп түсіндірді ҚР Қорғаныс министрлігінің ресми өкілі подполковник Руслан Жангулин.

БАҚ өкілдерінің бәріне дайындықтың базалық деңгейінен өткенін куәландыратын сертификат табыс етілді.

Ақпарат көзі: Министерство обороны Республики Казахстан