Бүгін ҚР Стратегиялық жоспарлау және реформалар Агенттігі Төрағасының орынбасары Сырымбет Қаскеев БҰҰ Балалар Қорының өкілдері ұйымдастырған  барлық мүдделі мемлекеттік органдар және ұйымдармен Қазақстандағы балалар мен жасөспірімдердің жағдайын Талдау (бұдан әрі-Талдау)  нәтижелерін талқылауға арналған кездесуге қатысты.    

«Талдау жобасында ұсынылған балалардың құқықтары, зорлық - зомбылықтан қорғау, денсаулық сақтау, білім беру, кедейлікпен күресу және қызметтерге қол жеткізу сияқты бағыттары елдегі балалардың жағдайын бағалаудың негізгі салалары және үнемі саяси назарда болып табылады» - деді спикер.

Биыл Мемлекет басшысы балаларға қатысты зорлық-зомбылықтың кез келген түрі үшін жауапкершілікті күшейтетін заңға қол қойды. Қабылданған заңның басты міндеті балалардың қауіпсіздігін қамтамасыз ету мәселелері бойынша мемлекеттік саясаттың құқықтық, экономикалық, әлеуметтік және ұйымдастырушылық негіздерін жетілдіру болып табылады.

«Қазіргі заман мен жаһандық үрдістердің әсері балалар мен жасөспірімдердің әл-ауқатына ықпал ететін факторларды тұрақты түрде бақылап отыру қажеттілігін тудырады. Сондықтан осындай зерттеулер жүргізу өте маңызды, олар бізге орын алып жатқан мәселелерді объективті бағалауға, оң үрдістерді анықтауға және оларды әрі қарай дамыту жолдарын қарастыруға мүмкіндік береді» - деп атап өтті С. Қаскеев.

Сонымен қатар, іс-шарада ЮНИСЕФ-тің Қазақстандағы өкілі Рашед Мустафа Сарвар, оның орынбасары Летисия Баззи-Вейл және аға консультант Робин Хаар Талдау нәтижелерінің жобасын таныстырумен, сондай-ақ балалардың құқықтары жөніндегі басым мәселелері жайлы айтты.

Ақпарат көзі: Қазақстан Республикасының Стратегиялық жоспарлау және реформалар агенттігі