Түркістан облысында биыл «Ауылда денсаулық сақтауды жаңғырту» ұлттық пилоттық жобасы аясында Түркістан облысында құрылысы жүргізілуі жоспарланған 48 медициналық-санитариялық алғашқы көмек беру нысандарының 6-ауы Жетісай ауданында бой көтеруде. Бүгін Жетісай ауданының Ж.Ералиев ауылдық округіне қарасты Көктөбе елді мекенінде фельдшерлік-акушерлік бекеттің құрылысы аяқталып, ел игілігіне тапсырылды. Денсаулық сақтау нысанының ашылу салтанатына арнайы келген Түркістан облысы әкімінің орынбасары Бейсенбай Тәжібаев пен Түркістан облыстық мәслихатының депутаты Талғат Қаржауов, Жетісай ауданының әкімі Серік Мамытов пен аудандық мәслихат төрағасы Медет Қасымов, «AMANAT» партиясы Жетісай аудандық филиалының атқарушы хатшысы Асқар Қайназаров аудан халқын қуанышымен құттықтап, денсаулық сақтау нысаны ауыл тұрғындарының өмір сүру сапасын жақсартып, азаматтардың денсаулығын жақсартуға мүмкіндік беретінін жеткізді. Жаңадан бой көтерген фельдшерлік-акушерлік пункттер тұрғындарға аса қажетті білікті кадрлармен және заманауи медициналық құрал-жабдықтармен қамтамасыз етілген. Бүгінгі қолданысқа берілген фельдшерлік-акушерлік бекетте қазіргі заманауи үлгіге сай әйелдерді қарап-тексеру бөлмесі, екпе бөлмесі, профилактикалық қарау бөлмесі, дұрыс тамақтану мектебі бөлмесі, дені сау бала бөлмесі, стерилизация бөлмесі, қақырық жинау бөлмесі, егу бөлмесі, тұрмыстық шаруашылық және дәріхана бөлмелері қарастырылған. Босану жасындағы әйелдер мен жүкті әйелдерді қарап-тексеру үшін барлық керекті медициналық құрал-жабдықтармен жасақталған. Физио-терапия бөлмесіне барлық ересектер мен балаларға созылмалы ауру өршуінде қосымша ем ретінде тағайындалатын электрожылу мен ультрасәулелер арқылы емдейтін терапия бөлігі, екіканалды сенсорлы манитор мен магнитотерапия аппараты және жоғарғы тыныс жолдары мен құлаққа арналған ультрофиолетті сәулелі аппараттар қолданысқа берілді. Түркістан облысы әкімінің баспасөз қызметі

Ақпарат көзі: ГУ "Аппарат акима Туркестанской области"