Елордалық бапкерлер «Тазалық пен тәртіп – жеңіске жол!» челленджіне арнап бейнеролик түсірді. Жаттығу барысында олар балаларға тазалық пен тәртіптің маңыздылығын түсіндірді. Осындай бейнеролик түсіргендер қатарында дзюдо спортының, батуттық гимнастиканың және шорт-тректің бапкерлері бар, деп хабарлайды елорда әкімдігінің ресми сайты.

Елордадағы №2 Балалар жасөспірімдер спорт мектебінің шорт-трек бөлімнің жаттықтырушы-оқытушысы Ғалия Жұмағазиева тазалықтың әр адамнан басталатынын атап өтіп, әріптестерін өз шәкірттеріне үлгі болуға шақырды.

«Тазалық – тәртіптен басталады. Мен әрқашан шәкірттеріме таза жаттығу зал – таза ойлар мен айқын мақсаттың бастауы екенін айтамын. Бұл спортшы үшін өте маңызды, себебі жаттығу залындағы тәртіп пен тазалық тәрбие, жауапкершілік және өз еңбегіне деген құрметті көрсетеді.

Бейнероликтің негізгі идеясы – залдағы тазалықтың тек шаңның жоқтығы емес екенін көрсету. Әрбір спортшы алдымен өзінен бастау керек, жаттығу залындағы тәртіп пен тазалықты сақтау керек.«Мен нағыз чемпион тек жарыстарда жеңіске жетуші ғана емес, сондай-ақ қоғам үшін үлгі болатын адам деп санаймын. Бапкер әрдайым үлгі болуы керек! Біз барлық бапкерді шәкірттеріне тәртіп пен тазалықтың маңыздылығын түсіндіріп жүруге шақырамыз», – деп атап өтті Ғалия Жұмағазиева.

Елордадағы Дене шынықтыру және спорт басқармасындағылар осындай профилактикалық және түсіндірме жұмыстарын тұрақты түрде жүргізетінін атап өтті.

«Астана қаласының Дене шынықтыру және спорт басқармасына қарасты спорт мектептері мен мекемелерінде өскелең ұрпақты тәрбиелеуге бағытталған түсіндіру шаралары тұрақты түрде өткізіліп келеді. Ерекше назар тазалық пен тәртіп мәдениетін қалыптастыруға, вандализмнің зиянды салдарын түсіндіруге, сондай-ақ нашақорлықтың алдын алуға аударылады. Бұл жұмыстар жүйелі түрде жүргізіліп, болашақта жақсы дәстүр ретінде жалғасын табады», – деді қалалық спорт басқармасының баспасөз хатшысы Мадина Айтқалиева.

Бұл челлендж жалпы Республикалық «Таза Қазақстан» экологиялық акциясының бір бөлігі болып, жастар арасында жауапкершілік пен құрмет мәдениетін қалыптастыруға бағытталған.

Ақпарат көзі: ГУ «Аппарат акима города Астана»