25 шілдеде Адам құқықтары жөніндегі уәкіл кеңсесінің өкілдері Шығыс Қазақстан облысының Жұмыспен қамтуды үйлестіру және әлеуметтік бағдарламалар басқармасының Өскемен қалалық балаларға арнаулы әлеуметтік қызметтерді көрсету орталығына барды.

Барудағы мақсат – қызмет алушылардың құқықтарының сақталуы мен олардың жағдайларын бақылау. Бұл орталықта тірек-қимыл аппараты бұзылған, психоневрологиялық аурулары бар 1,5 жастан 18 жасқа дейінгі балалар әлеуметтік қызмет алады.

Омбудсмен кеңсесінің өкілдері балалар сабақ өтетін бөлмелерді, спорт және жаттығу залдарын, психолог кабинетін, сенсорлық және медициналық кабинеттерді аралап көрді. Орталықта арнайы жабдықталған бассейн де бар. Келушілер Орталықтағы өз топтарына оңай жетуі үшін ғимараттың екінші қабатына апаратын екі баспалдақта да ыңғайлы көтергіштер орнатылған.

Айта кетерлігі, балалар күніне 4 мезгіл тамақпен қамтамасыз етіледі, оның ішінде аурулары бар балалар үшін емдеу кестелері бойынша бөлек тамақтану жүйесі қарастырылған. Сондай-ақ әрбір кішкентай қызмет алушы үшін жеке оңалту бағдарламасы әзірленген.

Ағымдағы жылы Шығыс Қазақстан облысы «Socium» пилоттық бағдарламасының қатысушысы болды, бұл – барлық көрсеткіштерді ескере отырып, цифрлық форматта әлеуметтік мекемелердің қызметін есепке алуды жүргізуге мүмкіндік беретін ақпараттық жүйе. Балаларға арнаулы әлеуметтік қызмет көрсету орталығы да бұл бағдарламаны сынақтан өткізуде.

«Socium» цифрлық платформасында кейбір кемшіліктер бар екені, бұл мамандардың жұмыс көлемін арттыратыны айтылды.

Іссапар барысында Уәкіл мекемесінің өкілдері қызмет алушылардың құқықтарын сақтау мәселелері бойынша түсіндіру жұмыстарын жүргізіп, көрсетілетін қызметтердің сапасын арттыру бойынша ұсыныстар берді.

Ақпарат көзі: Қазақстан Республикасындағы Адам құқықтары жөніндегі уәкіл