Адам құқықтары жөніндегі уәкіл кеңсесінің өкілдері Балалардың құқықтарын қорғау жөніндегі уәкілдің ШҚО бойынша өкілімен бірге Шығыс Қазақстан облысы Ұлан ауданындағы Кәмелетке толмағандарды бейімдеу орталығына барды.Уәкіл мекемесінің қызметкерлері балалардың жағдайымен және оларды қоғамға бейімдеу үшін өмір сүру жағдайларын зерделеу, медициналық және дәрі-дәрмекпен қамтамасыз ету, тамақтану және бос уақыттарын тиімді ұйымдастыруға бағытталған жұмыстармен танысты.Айта кету керек, кәмелетке толмағандарды бейімдеу орталығы бұрын Өскемен қаласында орналасқан болатын, 2024 жылдың ақпан айында орталық ғимараты Ұлан ауданы, Донское ауылына көшірілді. 2024 жылдың 15 сәуірінде алғашқы кәмелетке толмаған балалар қабылданды.Орталықтың көшуі оң жағдай болып, бірқатар мәселелерді тиімді шешуге мүмкіндік берді. Мысалы, ғимарат индустриалды аймақтан экологиялық таза аймаққа көшірілді, бұл балалардың денсаулығы мен әл-ауқатына оң әсер етеді, кәмелетке толмағандардың әлеуметтік-тұрмыстық жағдайлары жақсарды, олардың өмір сүруіне, дамуына және бейімделуіне барлық жағдай жасалды. Сонымен қатар, жаңа ғимарат осы типтегі мекемелерге қойылатын барлық талаптарға сай.Уәкіл кеңсесінің өкілдері мен Бала құқықтары жөніндегі уәкілдің өкілі кездесу қорытындысы бойынша білім, денсаулық сақтау және әлеуметтік қорғау басқармалары мен жергілікті атқарушы органдар арасында балаларды отбасына қайтару, балалардың ата-аналарын жұмысқа орналастыруға жәрдемдесу үшін заңды өкілдермен жұмыс жүргізуді күшейту жөнінде ұсынымдар берді.Естеріңізге сала кетейік, кәмелетке толмағандардың құқықтарының сақталуын бақылау Адам құқықтары жөніндегі уәкіл басқармасының негізгі жұмыс бағыттарының бірі болып саналады.

Ақпарат көзі: Қазақстан Республикасындағы Адам құқықтары жөніндегі уәкіл