Өтебаев атындағы Атырау мұнай және газ университетіне Қытай Ғылым академиясы Шыңжаң бөлімшесінің президенті  Chen Xi бастаған делегация академиялық және ғылыми қарым-қатынас орнату мақсатында жұмыс сапарымен келді.

Шыңжаң ғылым және технологиялар қауымдастығы, Шыңжаң экология және география институты, Шыңжаңдағы Гонконг зерттеу және үздіксіз білім беру институты, Цзянси педагогикалық университетінің өкілдері оқу орнының инфрақұрылымымен танысып, ғалымдармен кездесті.

Кездесу барысында Utebayev University ғылым және инновациялар жөніндегі проректоры Ринат Искаков ғылым, жоғары білім саласындағы халықаралық байланыстар мен атқарылған жұмыстардың нәтижесін атап өтті.

Тараптар ғылымды дамыту бойынша өзара ынтымақтастық мәселелерін талқылап, бірлескен зерттеулер жүргізіп, жаңа жобаларды жүзеге асыруға келісті. Алдағы уақытта қытайлық ғалымдармен бірге Жайық өзені деңгейінің көтерілуі, Каспий теңізінің экологиялық мәселелерін талқылау тақырыбында Utebayev University  базасында халықаралық конференция өткізу жоспарланып отыр.

https://www.facebook.com/watch/?v=1634448757095895 

Ақпарат көзі: Қазақстан Республикасы Ғылым және жоғары білім министрлігі