Құтқарушы күні қарсаңында Төтенше жағдайлар министрлігінің Жедел құтқару жасақтарының кинологиялық есептоптарын сертификациялау сынағы 2024 жылғы 14-17 қазан аралығында Қызылорда облысының Жаңақорған ауданындағы «Талды су» лагерінде өткізілуде. Республика көлемінде ұйымдастырылған іс-шараға 29 кинологиялық есеп қатысуда. 

14 қазандағы іс-шараның ашылу салтанатында ТЖМ Төтенше жағдайларды жою департаменті бастығының орынбасары, комиссия төрағасы А.Уакишев, Қызылорда облысы ТЖД бастығы P. Қайрақбаев, Жаңақорған ауданы әкімінің орынбасары Б.Ахметов, «Кызылорда еріктілері» қоғамдық бірлестігінің төрайымы О. Чебакова сөз сөйлеп, қатысушыларға сәттілік тіледі.

Сертификаттау комиссиясының құрамында ҚР ТЖМ Төтенше жағдайларды жою департаменті авариялық-құтқару қызметтерінің күштері мен құралдары басқармасының бас маманы  М.Амантай, Республикалық «Жедел құтқару жасағы» ММ Кинологиялық бөлімінің жетекшісі О. Гуржеева, Батыс Қазақстан облысы ТЖД  «Жедел құтқару жасағы» РММ Кинологиялық бөлімінің басшысы А. Ниязов, Қызылорда облысы ТЖД «Жедел-құтқару жасағы» РММ кинологиялық бөлімінің бас құтқарушысы Қ. Пірімжанов бар.

  Сынақтың алғашқы күні лабрадор, неміс, бельгиялық овчаркалар және басқа да қызметтік иттер тіл алу және шапшаңдылығын тексеру кезеңі бойынша сынаққа түсті.

Үш күнге жалғасатын іс-шарада қызметтік иттер табиғи ортада және қираған ғимараттар мен құрылыстар үйінділерінің ортасында іздестіру-құтқару кезеңдері бойынша тапсырмаларды орындайтын болады. Сынақтың  соңында арнайы сертификаттар табысталады.

Қызылорда облысы ТЖД

Ақпарат көзі: Министерство по чрезвычайным ситуациям Республики Казахстан