Женева, 2024 жылғы 22 шілде – Қазақстанның төрағалығымен Ядролық қаруды таратпау туралы шарттың (ЯҚТШ) 2026 жылғы Шолу конференциясына екінші Дайындық комитеті өз жұмысын бастады. Ядролық қаруды таратпау және қарусыздану саласындағы қазіргі күрделі геосаяси шындық жағдайында өтіп жатқан бұл маңызды оқиға Шарт ережелерінің орындалуына шолу бойынша негізгі алаң болып табылады.

Іс-шараны ашқан Төраға, ҚР Сыртқы істер министрінің бірінші орынбасары Ақан Рахметуллин ЯҚТШ мақсаттарына қол жеткізу үшін әлемдік қауымдастықтың бірлескен жұмысының маңыздылығын атап өтіп, Қазақстанның жаһандық ядролық қарусыздану ісіне бейілділігін растады.

ЯҚТШ-ға қатысушы 190 мемлекеттің делегаттары алдағы екі апта ішінде ЯҚТШ-ның үш тірегі: ядролық қарусыздану, атом энергиясын таратпау және бейбіт мақсатта пайдалану бойынша халықаралық ынтымақтастық пен сенімді нығайтуға бағытталған қарқынды талқылауларға қатысады.

Ұлттық тұрғыда Қазақстан делегациясы Ядролық қаруға тыйым салу туралы шартқа (ЯҚТСШ) қатысушы мемлекеттердің атынан Бірлескен мәлімдеме жасап, ядролық сынақтардан зардап шеккендерге көмек көрсету үшін Нысаналы қор құрудың маңыздылығын атап өтті.

Екінші Дайындық комитетінің жұмысы ү.ж. 2 тамызға дейін жалғасады.

1970 жылы күшіне енген Ядролық қаруды таратпау туралы шарт (ЯҚТШ) – ядролық қарудың таралуын болдырмауға, ядролық қарусыздануға жәрдемдесуге және ядролық энергияны бейбіт мақсатта пайдалануды ілгерілетуге бағытталған іргелі халықаралық құжат. ЯҚТШ Шолу конференциялары бес жыл сайын шарттың орындалуын бағалау және оның мақсаттарына жетудің келесі жұмыс бағыттарын айқындау үшін өткізіледі.

Ақпарат көзі: Министерство иностранных дел Республики Казахстан