Бұл және басқа да мәселелер Қазақстан Республикасы Стратегиялық жоспарлау және реформалар агенттігінің Қоғамдық кеңесінің отырысында талқылау тақырыбы болды.

Іс-шараға шақырылған спикерлер ретінде Сенат Төрағасының орынбасары Жақып Асанов, БҰҰ Даму бағдарламасының Қазақстандағы тұрақты өкілі Катаржина Вавьерниа және Өзбекстан Республикасы Президентінің жанындағы Стратегиялық реформалар агенттігінің нәтижелерді басқару Кеңсесінің жетекшісі Азиза Умарова қатысты.

Отырысты ашқан Агенттіктің Қоғамдық кеңес Төрағасы Әлихан Бәйменов ұзақ мерзімді басымдықтар мен жылдам жетістіктер арасындағы теңгерімді қамтамасыз ету көптеген елдердің үкіметтері үшін маңызды мәселе екенін атап өтті. «Бүгінгі Қоғамдық кеңестің отырысына тақырыпты жан-жақты талқылай алатын әртүрлі ұйымдардан кәсіби мамандар қатысуда, бұл Агенттік пен басқа да уәкілетті органдар үшін пайдалы болады деп ойлаймыз», - деді ол.

Реформалар агенттігінің төрағасы Жандос Шаймардановтың айтуынша, ұзақ мерзімді стратегиялық мақсаттар мен жылдам жетістіктердің үндесуі мен теңгерімі өзекті мәселе. «Елдің ұзақ мерзімді даму мақсаттары 2029 жылға дейінгі Қазақстан Республикасының Ұлттық даму жоспары аясында айқындалған. Оны сәтті жүзеге асыру үшін біз бекітілген басымдықтарды нақты және дәйекті түрде ұстана отырып, күн тәртібінің тұтастығын және нәтижелерге қол жеткізуге бағытталған назарды сақтауымыз қажет», - деді Агенттік басшысы.

Талқылау барысында сарапшылардың, соның ішінде жаһандық көзқарастағы пікірлер ұсынылды. БҰҰ Даму бағдарламасының тұрақты өкілі Катаржина Вавьерниа тұрақты даму мақсаттары саласындағы күн тәртібі жөнінде сөз сөйледі.

Әрі қарай, Applied Economics Research Center бас директоры Жаныбек Айғазин Қазақстанның стратегиялық және бюджеттік жоспарлауына қатысты ретроспективалық көзқарасты таныстырды.

Өз кезегінде, Агенттіктің стратегиялық жоспарлау және реформалар мониторингі департаментінің директоры Мұхтар Абуталип «Іс-әрекет басымдықтары матрицасы» негізіндегі реформаларға басымдық беру тәсілдерін ұсынды.

Отырыс соңында Азиза Умарова стратегиялық басымдықтарды орындаудың нәтижелерін бақылау және тиімділігін бағалау тәжірибесімен, сондай-ақ Өзбекстан Республикасында жүзеге асырылған әлеуметтік саясаттағы жылдам жетістіктердің мысалдарымен бөлісті.

Қоғамдық кеңес отырысын жаба отырып, кеңес мүшелері халықаралық тәжірибесі бар сарапшыларды тартып, маңызды мәселелерді жаңа форматта талқылауды жалғастыру туралы келісті.

Ақпарат көзі: Қазақстан Республикасының Стратегиялық жоспарлау және реформалар агенттігі