Шығыс Қазақстан облысының өңірлік коммуникациялар қызметінде өткен брифингте ТЖД мамандары ағымдағы жылдың осы уақытқа дейін облыста 492 өрт оқиғасы тіркелгенін хабарлады. Оның 342-сі тұрғын үй секторында орын алған, бұл барлық өрттердің шамамен 69%-ын құрайды.

Бүгінгі күнге дейін 52 мыңнан астам үй араланып, түсіндіру жұмыстары жүргізілді. ТЖД қызметкерлерінің тұрғын үй иелерімен әңгімелесу барысында 13 090-ға жуық бұзушылықтар анықталып, сол жерде жойылды.

Облыс аумағында әлеуметтік осал топтар тұратын 3 101 үй бар. Өрт қауіпсіздігі айлығы аясында мұқтаж және қозғалысы шектеулі азаматтарға ТЖД-ның аумақтық бөлімшелері түтін мұржаларын тазалау, пеш жабдықтарындағы жарықтар мен саңылауларды жою, пеш алдындағы қорғаныш металл қаңылтырды орнату бойынша көмек көрсетті. Бүгінгі күні мұндай отбасылардың үйлеріне иісті газдың (көміртегі тотығының) датчиктері орнатылуда. Соңғы жылдары орнатылған осы құрылғылардың арқасында 42 адамның өмірі құтқарылды.

15 қазаннан бастап әлеуметтік осал азаматтардың үйлерін аралаудың екінші кезеңі басталды. Бұл жұмысқа жергілікті атқарушы органдар, әлеуметтік қорғау, білім беру және полиция қызметкерлері де қатысады.

Қысты қауіпсіз өткізу үшін ТЖД мынадай шараларды жүргізуді ұсынады:

- түтін мұржалары мен жылыту жүйелерінің басқа да элементтерін күйеден маусым басталар алдында және маусым барысында тазалау.

- түтін арналары өтетін шатырларда барлық мұржалар мен қабырғаларды ақтау.

Пешті пайдалану кезінде мыналарға жол берілмейді:

- жанып тұрған пешті қараусыз қалдыру және оны балалардың бақылауына тапсыру.

- отын мен басқа да жанғыш заттарды пеш алдындағы қорғаныш металл қаңылтырдың үстіне қою.

- қатты отынмен жағылатын пештерді тез тұтанатын және жанғыш сұйықтықтармен жағу.

ШҚО ТЖД баспасөз қызметі

Ақпарат көзі: Министерство по чрезвычайным ситуациям Республики Казахстан