С.Аманжолов атындағы Шығыс Қазақстан университеті «Be to be» ауқымды кәсіптік бағдар беру шарасын ұйымдастырды. Шараға ҚР Ғылым және жоғары білім министрінің кеңесшісі Руслан Емелбаев қатысты.

Облыс аудандары мен қала мектептерінің 750 түлегі университеттің артықшылықтарымен танысып, болашақ мамандықтары жайлы кең ақпарат алды. ШҚУ-дың Жоғары мектептерінің өкілдері болашақ студенттерге білім беру бағдарламалары мен олардың ерекшеліктерін, сондай-ақ оқуға түсу шарттарын таныстырды. 

ҚР Ғылым және жоғары білім министрінің кеңесшісінің айтуынша, биыл бейіндік пәндер бойынша сұрақтар саны, сәйкесінше максималды балл өсті. Бейіндік пәндер бойынша сұрақтар саны – 40, максималды балл – 50. «Оқу сауаттылығы» мен «Математикалық сауаттылық» міндетті пәндерінен тапсырмалар саны 5 сұраққа қысқарып, 10 сұрақты құрайды. 

Кәсіптік бағдар беру шарасы барысында пәндік олимпиадалар мен «Bizdiң Өskemen Quiz» зияткерлік ойындарының жеңімпаздарын марапаттау салтанаты өтті. Көп балалы отбасылардан шыққан балалар мен «Үміт» балалар үйінің тәрбиеленушілеріне университет грантын растайтын сертификаттары табысталып, 22 оқушы жоғары оқу орнында тегін білім алуға ие болды. 

«Жақында мен құқық бойынша облыстық олимпиадаға қатысып, бірінші орынды иелендім. Сайыс әділ және ашық өтті. Бүгін көптен күткен грант сертификатын қолыма алдым. Анам екеуміздің қуанышымызда шек жоқ. Осындай мүмкіндік берген оқу орнына алғыс айтамыз. Енді студент атануға асықпын», - дейді Өскемен қаласының №22 орта мектебінің 11-сынып оқушысы Аружан Қажиақберова.

Ақпарат көзі: Қазақстан Республикасы Ғылым және жоғары білім министрлігі