Бейсенбі күні Ақтөбе облыстық қан орталығында Ақтауда әуе апатынан зардап шеккендерге қан тапсырғысы келетін қала тұрғындары жиналды. Олардың қатарында әртүрлі этнос өкілдері, зейнеткерлер, педагогтар, жастар және қарапайым қала тұрғындары бар.

Ниет білдірушілер ақпараттық сауалнамаларды толтырып, терапевтте болып, содан кейін іріктелгендер жалпы залға жіберілді. Олардың орнын басқалары алмастырып, қол ұшын созуға келгендер қатары көп болды. Күні бойы жалпы жүзден астам адам қан тапсырды.

Қан орталығының директоры Алтай Оразбағамбетовтың айтуынша, тұрғындардың белсенділігі өте жоғары.

«Тұрғындар қайғылы оқиғаға алаңдаулы. Біз шұғыл түрде қан сақтауға арналған арнайы стерильді контейнерлерді сатып алуымыз керек болды. Оны бүгін Ақтауға мұздатылған күйінде ұшақпен жібереді. Кеше біз 20 бөтелке амбулин мен шокқа қарсы препараттарды жөнелттік», - деп түсіндірді бас дәрігер.

Қан тапсыруға келгендердің арасында әзірбайжандар қауымдастығының өкілдері де бар.

«Бізді бұл трагедия есеңгіретіп тастады. Адамдар қайтыс болды. Біздің қауымдастық қаза тапқандардың барлық отбасыларына көңіл айтады. Біз ақсақалдармен және жастармен бірге зардап шеккендерді қолдауға келдік. Барлығы қан тапсырады. Зардап шеккендер сауығып, отбасыларына оралсын», - дейді әзірбайжандар қауымдастығы төрағасының орынбасары Видадий Фарзалиев.

Оның сөзін «Эллада» ЭМБ төрағасы Ираклий Козьмов та қолдады.

«Қорқынышты трагедия туралы естігеннен кейін мен бірден қан тапсыруға шешім қабылдадым. Қиындыққа тап болғандарға көмектесу – міндетіміз. Біз қаза тапқандардың отбасыларына көңіл айтамыз және зардап шеккендер тез сауығып кетеді деген үміттеміз».

Ақтөбелік Алтынбек Басенов алғашқылардың бірі болып қан тапсырды.

«Мен бұл жағдайға бей-жай қарай алмадым. Трагедия туралы естіп, көмек керек екенін түсіндім. Кеше кешкісін біле сала, міне бүгін таңертең осында келдім. Қан – мен қазір зардап шеккендерге көмектесе алатын ең кішкене ғана дүние. Біз батыс өңіріненбіз және мұнда әрқашан бір-бірін қолдайды. Ең бастысы, біздің әрекетіміз біреудің өмірін сақтауға көмектессе екен дейміз», - деді Алтынбек.

Бүгін Сервис колледжінің оқытушысы Ботакөз Бекмұхамбетова да қан тапсыруға келді.

«Әріптестерімізбен бірге зардап шеккендерді қолдауға шешім қабылдадық. Сабақтан қалмас үшін кезек-кезекпен қан тапсырамыз. Бұл біздің ортақ қайғымыз және мұндай қадамдар қиын сәттерде бірге болудың қаншалықты маңызды екенін көрсетеді», - дейді ол.

Ақтөбеліктер тапсырған қан бүгін Ақтауға жіберіледі.

Ақпарат көзі: ГУ «Акимат Актюбинской области»