ҚАЗАҚСТАН ӨКІЛДЕРІНІҢ КОРЕЯДАҒЫ КЕЗДЕСУІ: УНИВЕРСИТЕТ, ҒЫЛЫМ, ӨНДІРІС

  КР Премьер-Министрінің бірінші орынбасарының тәуелсіз кеңесшісі Kim Jin Ha-ның шақыруымен қазақстандық делегация құрамы Оңтүстік Кореяда болды. Делегация мүшелері құрамында – UMAY Ғылыми-зерттеу орталығы, А.Байтұрсынұлы атындағы ҚӨУ және А.Сағынов атындағы ҚарТУ, Allur компаниялар тобы, Alageum Electric өкілдері.

  Baitursynuly University ректоры Сейітбек Қуанышбаев: «Алғаш рет өндіріс пен ғылыми орталық өкілдері Кореяда енгізілген озық тәжірибелер мен технологияларды зерделеу үшін бас қосты. Біз қазақстандық индустрияның бәсекеге қабілеттілігін арттыруға және тиісті бағыттар бойынша кадрлар даярлауды жақсартуға бағытталған жобаларды, білім беру бағдарламаларын және ғылыми бастамаларды әзірлеуді талқыладық», - деп атап өтті.

  Бұған дейін Оңтүстік Корея мен ҚӨУ арасында академиялық байланыс орнаған. ЖОО білім алушылары «Hyundai» автомобиль корпорациясымен тығыз байланыста жұмыс істейтін және машина жасау саласына мамандар даярлауда мол тәжірибесі бар Dong-Eui университетінде білім алуда. Екі университет өткен айда тиісті меморандумға қол қойды. Келесі жылы тағы 10 студент Dong-Eui-де білім ала алады. Baitursynuly University ректоры тағы екі университет – Tech University of Korea және Kongju National University басшылығымен кездесті. Бұл университеттердің түлектері іс-сапар бағдарламасына енгізілген ірі өнеркәсіптік кәсіпорындарда жұмыс істейді.

  Қазақстандық делегация озық технологиялар саласында жоғары білікті мамандарды даярлауға мүмкіндік беретін оқу үдерісімен және инновациялық жобалармен танысты. Сондай-ақ штамптаудан бастап электр бөлшектеріне дейін толық циклді өндіріс жолға қойылған KIA флагмандық кәсіпорнында және жылу, атом және жаңартылатын энергетика саласындағы жетекші сарапшы ірі болат зауыты – Hyundai Steel мен Doosan Enterbility кәсіпорнында да болды.

Ақпарат көзі: Қазақстан Республикасы Ғылым және жоғары білім министрлігі