ҚАЗАҚСТАН УНИВЕРСИТЕТТЕРІНІҢ ERASMUS+ БАҒДАРЛАМАСЫНА ҚАТЫСУЫН АРТТЫРУ: НӘТИЖЕЛЕР МЕН ҰСЫНЫСТАР

  Қазақстандағы Erasmus+ Ұлттық кеңсесінің үйлестірушісі Л.Палуанова ҚР ЖОО проректорларына Еуропалық Одақтың Erasmus+ бағдарламасы жөнінде онлайн ақпараттық сессия өткізді. Іс-шараға еліміздің 57 ЖОО-нан 97 өкіл қатысты.

  Сессия барысында үйлестіруші қазақстандық ЖОО-ның Erasmus+ жобаларына қатысуы бойынша статистикалық деректер келтіріп, бағдарламаның әр бағыты бойынша көшбасшы университеттерді атап өтті, сондай-ақ жоба өтінімдерін әзірлеу, консорциум құру және 2024 жылғы конкурсқа дайындалу бойынша кеңестер берді.

  2015 жылдан бастап Erasmus+ бағдарламасы аясында еліміздің 70 ЖОО халықаралық кредиттік ұтқырлық жобаларымен, 56 ЖОО жоғары білім беру әлеуетін арттыру жобаларымен, ал 11 университет Жан Моне жобаларымен қамтылғанын атап өткен жөн. ЖОО-ның белсенділігін арттыру мақсатында Қазақстандағы Erasmus+ Ұлттық кеңсесі 2023 жылдың ақпан айынан бастап 17 онлайн ақпараттық сессия және еліміздің 12 қаласында 56 университетінде офлайн форматта ақпараттық сессия өткізіп үлгерген.

  Үйлестіруші ЖОО өкілдеріне 2024 жылдың конкурсына қазірден бастап дайындалуға кеңес берді. Сессияға қатысушылар сұрақтарын қойып, оларға жауап алды.

Ақпарат көзі: Қазақстан Республикасы Ғылым және жоғары білім министрлігі