20 мамырда Мәскеуде Ғұмарбек Дәукеев атындағы Алматы энергетика және байланыс университетінің (АЭжБУ) делегациясының сапары барысында "Мәскеу энергетикалық институты" (МЭИ) Ұлттық зерттеу университетімен ынтымақтастық туралы келісімге қол жеткізілді. Құжатқа АЭжБУ ректоры Нығыметов Ғани мен МЭИ ректоры Рогалев Николай қол қойды.

     Келісім екі ел экономикасының маңызды секторлары үшін білікті мамандарды даярлайтын Қазақстан мен Ресейдің екі жетекші энергетикалық жоғары оқу орындары арасындағы ұзақ мерзімді ынтымақтастықтың басталуын белгіледі.

     Тараптар Алматыдағы Energo University (АЭжБУ) базасында МЭИ Болашақ филиалының жұмыс істеуінің тұрақты моделін пысықтауға, жылу және электр энергетикасы саласында бірлескен қос дипломды оқыту бағдарламаларын іске қосуға, АЭжБУ базасында энергетика мамандарын нысаналы даярлаудың бірлескен орталығын құруға уағдаласты. Бұдан басқа, келісімде МЭИ-Хайнань университеті жобасын дамыту шеңберінде тараптардың білім беру және ғылыми салалардағы өзара іс-қимылы көзделген.

      "Кеңес заманынан бері үш жетекші энергетикалық жоғары оқу орындарының - Мәскеу, Иванов және Алматы энергетикалық институттарының бұрыннан келе жатқан тарихи байланыстарын ескере отырып, екі елдің энергетикалық кешендерінің озық заманауи технологиялары мен өзекті мәселелерін шешуге бағытталған ынтымақтастығымызды тереңдету орынды болар еді", - деп атап өтті Нығыметов Ғани.

Ақпарат көзі: Қазақстан Республикасы Ғылым және жоғары білім министрлігі