ЕҰУ-ДА КОМПЛАЕНС-ОФИЦЕРЛЕРГЕ АРНАЛҒАН СЕМИНАР ӨТТІ

  Л.Гумилев атындағы Еуразиялық Ұлттық университетінде жоғары оқу орындарының комплаенс-офицерлері үшін «Адал азамат – Әділетті Қазақстан» тақырыбында семинар ұйымдастырылды.

  Семинар барысында ҚР ҒЖБМ Жоғары және жоғары оқу орнынан кейінгі білім комитеті төрағасының орынбасары Ақерке Абылайхан, ҚР Сыбайлас жемқорлыққа қарсы іс-қимыл агенттігінің өкілдері баяндама жасады. Шара аясында «Цифрландыру жоғары білім беру саласындағы сыбайлас жемқорлыққа қарсы комплаенс құралы ретінде», «Сыбайлас жемқорлыққа қарсы комплаенстің Сыбайлас жемқорлыққа қарсы іс-қимылдағы рөлі» «Сыбайлас жемқорлықтың алдын алудың негізгі құралдары», «Цифрлық комлаенс ассистенті», «Жоғары білім беру ұйымдарында кадр саясатын іске асыру кезіндегі сыбайлас жемқорлық тәуекелдері. Контрагенттерді кешенді тексеру» тақырыптары талқыланды.

  Ақерке Абылайхан өз сөзінде: «Бүкіл қоғам болып жемқорлыққа қарсы күресті жалғастырамыз. Бізге және ұрпағымызға ешкім сырттан келіп жарқын болашақты жасап бермейді. Қағидамыз – әділдік, тірегіміз – жауапкершілік, мақсатымыз – өрлеу», - деп Президенттің Құрылтайда атап өткеніне тоқтала келе, университтетерде сыбайлас жемқорлыққа қарсы саясатты жүргізуде комплаенс-офицерлердің рөлі ерекше екендігін баса айтты.

  Қазіргі таңда сыбайлас жемқорлыққа қарсы күресте жоғары білім саласында айтарлықтай қадамдар жасалды. Атап өтетін болсақ, 2026 жылға дейінгі сыбайлас жемқорлыққа қарсы саясатының тұжырымдамасы іске асырылуда. Мәселен, бакалавриаттың 3889, магистратура деңгейіндегі 98, докторантураның 9 білім беру бағдарламасына парасаттылық тақырыптары енгізілген; жоғары оқу орындарында 94 комплаенс-қызметтер жұмыс істеуде; ISO 37001 Халықаралық сыбайлас жемқорлыққа қарсы стандарт жоғары оқу орнында енгізілуде; Академиялық адалдық лигасы құрылып, құрамына 18 жоғары оқу орны кірді; білім алушылардың барлық жұмыстары плагиатқа қарсы бағдарлама арқылы өтеді; 5 жоғары оқу орындары магистратура деңгейінде болашақ комплаенс-офицерлерді дайындауда. Сондай-ақ жоғары оқу орындарының 1991-2023 жж. түлектерінің 85 пайыздан астам дипломдары цифрландырылды.

Ақпарат көзі: Қазақстан Республикасы Ғылым және жоғары білім министрлігі