ХҒТО МЕРЕЙТОЙЫ: ҚАУІПСІЗ ӘЛЕМ ҮШІН ҒЫЛЫМДАҒЫ 30 ЖЫЛ

  Бүгін, 6 шілде күні, Астанада Халықаралық ғылыми-техникалық орталықтың 30 жылдық мерейтойының салтанатты рәсімі өтті. «Қауіпсіз әлем үшін ғылым» тақырыбында өткен іс-шара ХҒТО-ның соңғы үш онжылдықтағы қызметіне арналды.

  Іс-шараға ҚР Ғылым және жоғары білім министрі Саясат Нұрбек және мемлекеттік ведомстволардың басқа да жоғары лауазымды тұлғалары, сондай-ақ көрнекті ғалымдар, халықаралық ұйымдар, елшіліктер және әлемнің 25 елінің, оның ішінде ХҒТО-ға мүше 10 елдің (Армения, Грузия, Еуропалық Одақ, Жапония, Қырғызстан, Норвегия, Оңтүстік Корея, Тәжікстан, АҚШ және қабылдаушы ел Қазақстан) өкілдері қатысты.

  Салтанатты жиынды ХҒТО Басқарушылар кеңесінің төрағасы доктор Рональд Леман және ХҒТО атқарушы директоры Дэвид Клив ашып, орталық тарихына, халықаралық ғылыми жобаларды іске асырудағы негізгі бағыттарға тоқталды.

  ҚР Ғылым және жоғары білім министрі ведомство қызметінің негізгі бағыттарының бірі ХҒТО-мен халықаралық ынтымақтастықты тереңдету екендігін атап өтті.

  «Халықаралық ғылыми-техникалық орталықтың 30 жылдық мерейтойы қарсаңында орталықтың тарихи жолын ғана емес, ғылымның дамуына және бейбітшілікті қамтамасыз етуге қосқан елеулі үлесін ерекше атап өту қажет. Осы жылдар ішінде ХҒТО 4500-ден астам жобаны жүзеге асырды, оған 80 000-нан астам ғалым атсалысты, 1,6 миллиард АҚШ доллары көлемінде қаржы жинады. Қазіргі уақытта біздің еліміз орта дәліз әлеуетін пайдалану, нарықтарды байланыстыра алу мүмкіндіктері жағынан бірегейлікке ие. Ғылыми саланы дамыту маңызды, бұл ретте біз еліміздегі зерттеу қауымдастығын өзгертуге үлгі болатын осындай ықпалды орталықпен ынтымақтастықты мақтан тұтамыз. Ғылымның дамуына және әлемдік әл-ауқатқа қосып жатқан үлесі үшін ХҒТО-ға шынайы ризашылығымды білдіремін. Бірлескен жұмысымыз жемісін беріп, ғылымның ілгерілеуіне ықпал етсін», - деді министр.

  Халықаралық спикерлер Жапонияның Парламенттік Сыртқы істер Вице-министрі Фуказава Иоичи, АҚШ-тың Қазақстандағы елшілігі өкілдігі басшысының орынбасары Джуди Куо және ЕО-ның Қазақстандағы делегациясының саяси бөлімінің басшысы және ХҒТО-ның Үкіметтік серіктесі Мачей Мадалинский орталықтың халықаралық аренадағы рөліне тоқталды.

  ХҒТО-ның Кеңес одағы ыдырағаннан кейін бұрынғы ғалымдарды қайта бағыттау мақсатында Жаппай қырып-жою қаруын таратпау мәселелерімен айналысатын ұйым ретінде құрылғанына 30 жыл өтті. Орталықты жаңғырту арқылы оның қызмет аясы кеңейіп, географиялық қамтуы ұлғайды, тиімділігі артты, бұл ядролық қаруды таратпау саласындағы әлеуетті кеңірек арттыруға және ХҒТО елдері үшін зерттеу жобаларын жүзеге асыруға ықпал етті.

  Соңғы онжылдықта Қазақстан өзінің ғылыми әлеуетін едәуір дамытып, ХҒТО көптеген бастамашыл жобаларын дамытуда жетекші рөлдердің бірін атқарды. Бұл сейсмология, ядролық сараптама, радиоактивті көздердің қаупін азайту, ядролық қаруды таратпау, қорғаныс пен қауіпсіздікті қамтамасыз ету әлеуетін нығайту және басқа салалардағы ынтымақтастық.

  бейнематериалға сілтеме

Ақпарат көзі: Қазақстан Республикасы Ғылым және жоғары білім министрлігі