Ақтөбе облыстық және қалалық мәслихаттардағы «AMANAT» фракциясының кеңейтілген жиынында депутаттар жергілікті атқарушы органдармен бірге партияның Сайлауалды бағдарламасының жүзеге асырылу барысын талқылады. Шараға облыс әкімі Асхат Шахаров қатысты.

Былтыр «AMANAT» партиясының «Халықпен бірге!» сайлауалды бағдарламасы әзірленген еді. Басты мақсаты – халықтың тұрмыс деңгейі мен сапасын жақсарту. Бүгінде бағдарлама аясында нақты орындалу индикаторлары бар кешенді жоспар –  Жол картасының 135 тармағы жүйелі іске асырылып келеді. Оның 122-сі биылғы жылға жоспарланған.

Жиында модераторлық еткен партияның облыстық филиалы төрағасы Ербол Данағұлов Жол картасын жүзеге асырудағы оң динамикаға назар аударды. Мәселен, биыл өңірде 920 орынға арналған 6 мектеп, 4 медициналық пункт пайдалануға берілді. Сондай-ақ 3 спорт кешені, 2 ауылдық клуб және Ақтөбе қаласында балалар футбол академиясы ашылды. Алға, Әйтеке би, Мәртөк, Темір аудандарындағы бөгеттерге күрделі жөндеу жүргізілді. Халықтың әлеуметтік осал топтарына 633 пәтер берілді. «Жер аманаты» жобасы аясында 237,2 мың гектар ауыл шаруашылығы мақсатындағы жер мемлекет меншігіне қайтарылды.

«Сайлауалды бағдарлама – басты құжатымыз. Ол ел дамуына дауыс берген отандастарымыздың талап-тілектері негізінде жасақталды. Сондықтан да бағдарламада барлық әлеуметтік топтың мүдделері ескерілген. Ендеше халықтың үмітін ақтап, берілген уәделерді орындау – біздің ортақ жауапкершілігіміз», - деді Ербол Данағұлов. 

Жиында сондай-ақ жолаушылар көлігі және автомобиль жолдары басқармасы басшысының орынбасары  Е.Аманбаев, Денсаулық сақтау басқармасы басшысының орынбасары М.Қажғалиев, Ақтөбе қаласының әкімі А.Бекет, Ақтөбе облысы әкімінің орынбасары А.Әбдікәрімов Жол картасының орындалу барысы туралы баяндамаларын оқыды.

Басқосуды қорытындылаған өңір басшысы 2025 жылы атқарылатын жұмыстардың басым бөлігі сайлауалды бағдарламаға негізделген Жол картасы аясында екенін  айтып өтті.

«Amanat» партиясының сайлауалды бағдарламасын іске асыру – өңірді дамытудағы басым бағыт. 2025 жылға жергілікті бюджетті 439 млрд. теңге көлемінде бекіттік, негізгі басымдық сайлауалды бағдарламаның Жол картасын орындауға бағытталған. Сонымен қатар, қаражат бюджетті нақтылау қорытындылары бойынша ұлғайтылады.  Жалпы, Ақтөбе облысының  экономикалық өсімін қамтамасыз ету және халықтың өмір сүру сапасы мен әл-ауқатын жақсарту үшін қысқа мерзімде тиісті шараларды қабылдаймыз. Өңірде партияның сайлауалды бағдарламасын орындау бойынша тиісті жұмыстар жүргізілуде», - деп Асхат Шахаров сөзін түйіндеді.

Депутаттар отырыста партияның сайлауалды бағдарламасын жүзеге асырудың кейбір пункттеріне тоқталып,  жергілікті атқарушы органдар назар аудару қажеттігін алға тартты.

Ақпарат көзі: ГУ «Акимат Актюбинской области»