Қоғамдық қабылдауда ақтөбеліктердің өтініш-тілектерін партияның Ақтөбе облыстық филиалының төрағасы Ербол Данағұлов, облыстық және қалалық мәслихат төрағалары Гүлқасима Сүйінтаева мен Анар Даржанова, қала әкімі Азамат Бекет те тыңдады.

Әкімге өңір тұрғындары тұрғын үй беру, әлеуметтік және медициналық мәселелерді шешу, сондай-ақ инфрақұрылымды жақсарту мәселелерін жеткізді. Қабылдау барысында түрлі өтініштер мен ұсыныстарқаралды.

Қабылдауда қозғалған мәселелердің бірі – Ақтөбедегі Алаш қозғалысының көрнекті қайраткері Ораз Тәтеұлының құрметіне ескерткіш-бюст орнату туралы ұсыныс. Мәселені жергілікті тұрғындар С.Төрекешов пен Н.Қалиев көтерді, әкім бұл ұсынысты тиісті органдар қарайтынын атап өтті.

«Алаш» мүгедектер қоғамдық бірлестігінің төрағасы Ә.Елеусізов өз қамқорлығындағы азаматтардың әлеуметтік, медициналық және тұрғын үй мәселелерін көтерсе, мүгедектігі бар екі баланы тәрбиелеп отырған көпбалалы ана Қ.Нұрғалиева тұрғын үй беру мәселесін шешіп беруді сұрады. 

Халықтың әлеуметтік осал топтары санатындағы С.Таңалиев апатты жағдайдағы баспанасының орнына тұрғын үй беру туралы өтінішін білдірді. Әкімге осыған ұқсас мәселемен тағы бес адам жүгінді. Алайда аймақ басшысы бұл сұрақ заң аясында шешілетінін алға тартып, жауапты тұлғаларға барлық өтінішті мұқият зерделеуді тапсырды.

Сонымен қатар, «Ұстаз» саяжайының тұрғындары Сазды өзенінің арнасын тазарту және сумен жабдықтау, Аққұм және Байжанкөл ауылдарының тұрғындары газ тарту мәселелеріне алаңдаушылық білдірді.  

Облыс әкімі Асхат Шахаров барлық келіп түскен өтініштер бойынша жауапты тұлғаларға тапсырма берді. Әрбір мәселеге қатысты шешім қабылданады.

Ақпарат көзі: ГУ «Акимат Актюбинской области»