Президент Қасым-Жомарт Тоқаев ғалымдармен кездесуде сөйлеген сөзінде жас ғалымдарды әлеуметтік қолдау - мемлекеттің міндеті екенін атап өтті.

Кездесу барысында Алматылық он жас ғалым пәтер иегері атанды. Олар салтанатты түрде Президенттің қолынан тұрғын үй сертификаттарын алды.

"Өткен жылы 284 жас ғалым баспана алды. Биыл менің тапсырмам бойынша оларға тағы 200 пәтер бөлінеді", - деді Президент ғалымдардың алдында сөйлеген сөзінде.

Бұл маңызды оқиға жас мамандардың ғылыми-техникалық прогреске және Қазақстанның зияткерлік әлеуетін нығайтуға қосқан үлесінің маңыздылығын көрсетеді.

     Әлия Темірхан - Ел Президенті Қасым-Жомарт Тоқаевтан "Жас ғалым" бағдарламасы бойынша пәтер сертификатын алған жас ғалымдардың бірі. Ғылыми салада ол 2014 жылдан бері жұмыс істейді және бүгінде зерттеулермен белсенді түрде айналысады. Бұған дейін ол ұлымен бірге анасының пәтерінде тұрған. "Енді бізде өз үйіміз болады", - дейді ол.

     Ә.Х.Марғұлан атындағы Археология институты жанындағы физикалық антропология зертханасының меңгерушісі, антропология ғылымдарының PhD докторанты Рамазан Жанұзақ - пәтердің бақытты иелерінің бірі. Рамазан Жанұзақ - палеоантропология саласындағы жалғыз жас ғалым.

     Мемлекет басшысы Қасым-Жомарт Тоқаевтың Алматыда өткен жас ғалымдармен кездесуінде Әл-Фараби атындағы Қазақ ұлттық университетінің доценті Ерғали Құрманов салтанатты түрде пәтер сертификатының иегері атанды.

     Жас ғалым бүгінде ҚазҰУ-да физика және астрономия саласында ғылыми зерттеу жұмыстарымен айналысады. Алматы қаласынан пәтерлі болған Ерғали Бержігітұлы өз сөзінде ҚР Президентіне жас ғалымдарға көрсетіліп жатқан әлеуметтік көмек үшін ризашылығын білдірді.

     Мемлекет басшысы Қасым-Жомарт Тоқаевтан салтанатты түрде пәтер сертификатын алған жас ғалымның бірі - Әл-Фараби атындағы Қазақ ұлттық университеті философия және саясаттану факультетінің оқытушысы Сәмет Байжұма. Ғылымдағы еңбек жолын ҚазҰУ-дағы «Әл-Фараби» орталығында ғылыми қызметкер болып бастаған. Көпбалалы әке.

    Жас ғалымдармен кездесуде ел Президенті Қасым-Жомарт Тоқаевтан салтанатты түрде пәтер сертификатын алған жас ғалымдардың бірі - Халықаралық білім беру корпорациясының қауымдастырылған профессоры Шынар Құлтаева.      Шынар Құлтаева Мемлекет басшысына жас ғалымдарға қолдау көрсетіп, ғылымның көкжиегін бағындыруға шексіз мүмкіндіктер бергені үшін алғысын білдірді. Жас ғалым өзінің бүгінгі жетістігі ғылым жолындағы жастарға үлгі болса екен деп, қоғам игілігі үшін аянбай еңбек етуге шақырды.

  Ел Президенті Қасым-Жомарт Тоқаевтың қолынан пәтер кілтін алған жас ғалымның бірі - Қазақстан Республикасы Президентінің жанындағы Ұлттық ғылым академиясының бас академиялық қызметкері Нұрлан Бакранов.      Жас ғалым елімізде қазір мемлекет тарапынан ғылымға кең көлемде көңіл бөлініп, жан-жақты қаржылай қолдау көрсетіліп жатқанын атап өтті. Ғалымдарға ғылыммен айналысуға берілген мүмкіндіктер үшін Президентке алғысын білдірді.

     «Мемлекет басшысымен кездесуге шақырылғанымды білдім, үйдің кілті қолыма тигенде сенер-сенбесімді білмедім. Әлі қобалжып, бір жағынан қуанып тұрмын», - деп ағынан жарылды.

     Кеше Мемлекет басшысы Қасым-Жомарт Тоқаев Satbayev University-дің Стандарттау, сертификаттау және метрология кафедрасының аға оқытушысы Жансая Омароваға тұрғын үй сертификатын табыс етті! 

     Жансая Омарова 2023 жылғы жоғары оқу орнының үздік оқытушысы марапатының иегері және де фотовольтаика саласындағы белсенді зерттеуші.

     Ғалымдармен өткен жиында Президенттің қолынан өзінің алғашқы пәтерінің кілтін алғандардың бірі - аналитикалық химия және сирек металдар мен элементтер химиясы бойынша философия докторы, қауымдастырылған профессор Айназ Әбілдина.

Ақпарат көзі: Қазақстан Республикасы Ғылым және жоғары білім министрлігі