Бүгін, 28 мамыр күні, ҚР Ғылым және жоғары білім министрі Саясат Нұрбек Бейжің тіл және мәдениет университетінің (Beijing Language and Culture University) Президенті Дуань Пэнмен кездесті. Делегация құрамында халықаралық ынтымақтастық департаментінің директоры Донг Чуан, шетелдік студенттер департаментінің директоры Ма Сяолэй және халықаралық білім беру департаменті директорының орынбасары Ван Лян болды.

     Кездесудің басты тақырыбы ретінде Астанада Бейжің тіл және мәдениет университетінің филиалын ашу мәселесі талқыланды. Күн тәртібінде құқықтық және қаржылық аспектілер, филиалды тіркеу, академиялық бағдарламалар және студенттерді тарту процесі кірді.

     Министр Саясат Нұрбек ведомство филиалдың ашылуын толық қолдайтынын атап өтті.

    «Жоғары білім саласындағы Қазақстан мен Қытайдың ынтымақтастығы өте белсенді. Бұған дейін ұйымдастырылған кездесулер мен жоғары деңгейдегі келіссөздер айқын дәлел болып отыр. 2023 жылдың желтоқсанында мен ҚХР білім министрінің орынбасары Сунь Яо мырзамен, ал 2024 жылдың сәуірінде ҚХР Білім министрі Хуай Цзиньпэнмен кездестім. Қытай тарабы кадрларды, әсіресе қытай тілі мұғалімдерін даярлауда ынтымақтастықты нығайтуға қызығушылық білдірді. Біз Астана халықаралық университеті негізінде Бейжің тіл және мәдениет университетінің филиалының ашылуын толық қолдаймыз», - деді Саясат Нұрбек.

     Конструктивті диалог үшін Министр Бейжің университетінің филиалының гранттарын Қытай Үкіметінің стипендиялық бағдарламасы негізінде беру және филиал қабырғасында қытай тілі мұғалімдерін дайындау туралы келісімдерді жүзеге асыру бойынша бірқатар ұсыныстар жасады.

     Кездесу соңында қатысушылар одан әрі жемісті ынтымақтастыққа дайын екендігін айта отырып, Астанадағы филиалды сәтті ашу үшін алда келесі қадамдарды талқылайтындарын атап өтті.

     Бейжің тіл және мәдениет университеті – бай тарихы, қытай тілі мен мәдениетін халықаралық оқыту бойынша ауқымды оқыту ресурстары бар оқу орны. 1962 жылы құрылған университет бүгінгі күнге дейін 176 әлем елдерінен 160 мыңнан астам шетелдік студенттерді дайындады. Түлектердің көпшілігі академиялық, саяси және іскерлік салаларда танымал, әйгілі тұлғалар. Бейжің тіл және мәдениет университетінде тіл оқығандардың бірі – ҚР Президенті Қасым-Жомарт Тоқаев.

Ақпарат көзі: Қазақстан Республикасы Ғылым және жоғары білім министрлігі