СӘТБАЕВ УНИВЕРСИТЕТІНІҢ СТУДЕНТТЕРІ РЕСПУБЛИКАЛЫҚ ЭКОЛОГИЯЛЫҚ КОНКУРС ЖЕҢІМПАЗДАРЫ АТАНДЫ

  Қазақстанның жоғары оқу орындары арасында тұрмыстық қалдықтарды бөлек жинауға арналған «3.2.1. Старт!» жобасының 8 маусымы өз мәресіне жетті. Сәтбаев Университетінің студенттері 7,7 тонна пластик жинап, І орынға ие болды, сөйтіп олар шикізатты қайтадан өңдеуге арналған құрал-жабдықты жеңіп алды.

  Жоба кураторы, Инфрақұрылымды басқару департаментінің бас маманы Ұлпан Тұрғанбаева студенттердің табандылығының арқасында ғана университет бірінші орынды жеңіп алды деп есептейді. Пластик жинауға университеттің барлық студенттері қатысқан – олар қалдық салатын арнайы ыдысты студенттік қалашықтың барлық жерлеріне орнатты, қолданылған пластик соған салынды.

  «Жиналған пластикті студенттер апта сайын өткізіп отырды. Сондай-ақ университет маңайына жасыл желек отырғызылып, толық көлемдегі 5 сенбілік өткізілді, оған ЖОО-ның 3 мыңнан астам студенттері қатысты. Студенттік құрылыс отряды мен Жастар және спорт департаменті көмегінің арқасында университет қалдықтарды қайта өңдеуге арналған желі құра алады, одан біз гүлсауыт пен жол жиектерін жасауды жоспарлап отырмыз», - деді ол.

  «3.2.1. СТАРТ!» жобасы студенттерді қоршаған ортаны таза ұстауға баулиды, жасыл принциптерді ілгерілету және Тұрақты даму мақсаттарына қол жеткізу ісіне студент жастарды тарта отырып, пластикті жинау және қайта өңдеу үлгілерін жасайды. Қайта өңделген пластик жаңа өнімге айналады, олардың ең үздіктері «Plastic in Art» көрмесіне қойылады.

Ақпарат көзі: Қазақстан Республикасы Ғылым және жоғары білім министрлігі