ШҚТУ-ДА ИНЖЕНЕРЛІК БІЛІМІНІҢ ЖАҢА ТҰЖЫРЫМДАМАСЫ ТАЛҚЫЛАНДЫ

  Д.Серікбаев атындағы ШҚТУ базасында инженерлік білім саласындағы оқу-әдістемелік бірлестіктің (ОӘБ) «ҚР Инженерлік білімін дамыту тұжырымдамасы» тақырыбында кеңейтілген көшпелі отырысы өтті.

  Іс-шараға ҚР ҒЖБМ Жоғары және жоғары оқу орнынан кейінгі білім комитеті төрағасының орынбасары Гүлжан Жарасова, ҚР техникалық жоғары оқу орындарының ғалымдары, сондай-ақ өнеркәсіптік компаниялардың өкілдері қатысты. ОӘБ қызметі Ұлттық біліктілік шеңберіне және кәсіби стандарттарға сәйкес қазақстандық жоғары және жоғары оқу орнынан кейінгі білім беру жүйесін дамытуға, оның әлемдік білім беру кеңістігіндегі бәсекеге қабілеттілігін арттыруға, білім беру процесін оқу-әдістемелік сүйемелдеуге және білім беру сапасын қамтамасыз ету жүйесін жетілдіруге бағытталған.

  2023 жылдың желтоқсанынан бастап ОӘБ Қ.Сәтбаев атындағы ҚазҰТЗУ, Д.Серікбаев атындағы ШҚТУ және С.Өтебаев атындағы Атырау мұнай және газ университетімен бірлесіп «Инженерлік білім беру тұжырымдамасын» әзірлеуде. Тұжырымдама ШҚТУ және ҚазҰТЗУ базасында оқу-әдістемелік бірлестіктің кеңейтілген көшпелі отырысында ұсынылса, ал оны талқылау ҒЖБМ, ЖОО, индустрия өкілдерімен және басқа да мүдделі тараптармен өткізіледі.

  «ШҚТУ алаңында техникалық бағыттағы кадрлар мен инженерлерді даярлайтын барлық жоғары оқу орындары жиналды. Елімізде мұндай 52 оқу орны бар. Көптеген индустриалды кәсіпорындар өңірлерде орналасқандықтан, тығыз ынтымақтастық пен техникалық кадрларды даярлау тәжірибесі жаңа тұжырымдамаға оң әсер етеді. Ал ШҚТУ-дың кәсіпорындармен ынтымақтастықтағы және индустрияға қажетті кадрларды шығарудағы тәжірибесі өте зор», - деп атап өтті Гүлжан Жарасова.

  Айта кетейік, Д. Серікбаев атындағы ШҚТУ мен Қ.Сәтбаев атындағы ҚазҰТЗУ ҚР ҒЖБМ бағдарламалық-мақсатты қаржыландыруы бойынша ауқымды «Тұрақты даму мақсаттарын іске асыру контекстінде инженерлік білім берудің ұлттық моделін құру» жобасын жүзеге асырып келеді. Жоба еңбек нарығының «Өңірлік құзыреттер картасын», инженерлік білім беру стандартын және инженерлік кадрларды кәсіби сертификаттау орталығын құруды қоса алғанда, инженерлік білім берудің ұлттық моделі үшін стратегияларды әзірлеуге бағытталған. Бұдан бөлек, инженерлік және инженерлік-педагогикалық кадрлардың біліктілігін арттырудың ұлттық стратегиясын іске асыруды қамтиды.

  Көшпелі отырыста Қазақстанның жетекші және елімізге еңбегі сіңген ғалымдары, ірі өнеркәсіптік кәсіпорындарының өкілдері, ҚР университеттерінің проректорлары сөз сөйледі. Отырыс нәтижесінде қатысушы тараптардың ұсыныстарын ескере отырып, инженерлік білім беру тұжырымдамасына түзетулер енгізіледі.

Ақпарат көзі: Қазақстан Республикасы Ғылым және жоғары білім министрлігі