BAITURSYNULY UNIVERSITY МЕН UNIVERSITY OF ARIZONA ҒАЛЫМДАРЫ БІРЛЕСЕ ЖҰМЫС ІСТЕУГЕ ДАЙЫН

 Қостанайға Аризона университетінен келген делегация А.Байтұрсынұлы атындағы ҚӨУ ғалымдарымен кездесті. Ғалымдар Shane Campbell Burgess пен Kevin M.Fitzsimmons Қазақстанда ауыл шаруашылығы дақылдарының өнімділігін арттыру және азық-түлік өнімдерін өндіруді зерттеуге мүдделі.

 Кездесу барысында қостанайлық және американдық ғалымдар ет және сүт шаруашылығы бағытында талдау және ғылыми әзірлемелермен ҚӨУ базасында айналысатын зерттеу орталығын ашу туралы алдын-ала уағдаластыққа қол жеткізді.

 Делегация өкілдері университеттің материалдық-техникалық базасымен танысты. Ауыл шаруашылығы ғылымдары факультетін, сүт және ет сапасын талдау зертханасын, жемшөп сапасын талдау зертханасын, қолданбалы биотехнология ғылыми-зерттеу институтын және Smart орталығын аралады.

  «Аризона Университетінен келген әріптестеріміздің мақсаты – агрономия, ветеринария, биология және басқа да салаларда ғылымды дамытуға атсалысу. Бұл кездесудің нәтижесі екі жоғары оқу орнының табысты ғылыми ынтымақтастығы болады деп үміттенеміз», - деді Baitursynuly University ректоры Сейітбек Қуанышбаев.

 Сондай-ақ қазірдің өзінде аяқталып тұрған бірнеше ғылыми-зерттеу жобалары және әлі де әзірленіп жатқан жобалар таныстырылды. ҚӨУ оқытушылары шетелдік әріптестері көмектесе алатын проблемалық мәселелерді атап өтті. Атап айтқанда, Қостанайдың әйгілі жылқы тұқымының жойылу қаупі, топырақ токсикологиясын терең зерттеу, су ресурстарын бақылау және басқа да мәселелер талқыланды.

  «Біз университеттің материалдық-техникалық базасымен және оның ғылыми әлеуетімен таныстық. Жобаларды да зерттедік. Тақырыптарымыздың сәйкес келіп жатқаны маңызды. Біздің ғылыми қызығушылығымыз да ортақ», - деп түйіндеді Shane Campbell Burgess.

Ақпарат көзі: Қазақстан Республикасы Ғылым және жоғары білім министрлігі