2024 жылғы 21 шілдеде әлеуметтік желілерге мониторинг жүргізу барысында Атырау облысы, Махамбет ауданы, Бейбарыс ауылында орналасқан Сарыөзек арнасында балықтардың қырылғаны туралы ақпарат анықталды.

Бұл дерек бойынша құзырлы мемлекеттік органдар, жергілікті атқарушы органға, сондай-ақ ғылыми ұйымдарға жедел түрде хабарланды.

Жайық-Каспий облысаралық бассейндік балық шаруашылығы инспекциясының басшысы басшылығымен Атырау қаласы бойынша экология департаментінің өкілдері, Бейбарыс ауылы әкімдігінің, сондай-ақ ғылыми ұйым мен «ҚазСуШар» РМК өкілідерінен құрылған комиссия құрамы балық қырылуы болжалды орын алған жерге шықты.

Шабақтардың қырылуы туралы ақпарат расталды. Өлген шабақтардың жалпы салмағы шамамен 80 килограмды құрайды.

Жергілікті атқарушы органдармен санитарлық нормаларды сақтай отырып, өлген шабақтарды жинап,

жою

жұмыстары ұйымдастырылды.

Шабақтардың қырылуына Сарыөзек каналындағы судың төмен деңгейі себеп болды (судың тереңдігі 40-50 см). Атырау облысы экология департаменті зертханалық зерттеулер жүргізу үшін су сынамасын алды.

Балық қорғау қызметкерлерімен, жергілікті атқарушы органдардың, балық шаруашылығы субъектілерінің өкілдерімен, еріктілермен бірлесіп балық шабақтарын құтқару жұмыстары жүргізілуде.

Құтқарылған шабақтар сазан, табан, көксерке, жайын және ұсақ мөңке балықтары , орташа салмағы 12-14 грамм, саны 100 мың данадан асады.

Қазіргі уақытта бұл су қоймасында шабақтарды құтқару жұмыстары жалғасуда.

Ақпарат көзі: Министерство сельского хозяйства Республики Казахстан