Елорда прокуратурасының үйлестіруімен «Құқықтық тәртіп» шарасын іске асыру аясында полиция және жергілікті атқарушы органдар вандализмге қарсы күрес жұмыстарын жалғастыруда, деп хабарлайды Астана әкімдігінің ресми сайты.

Полицейлер кезекті бұзақыларды тауып, жазалады.

Сонымен, 9 наурыз күні сағат 14:00 шамасында 28 жастағы ер адам көлік жүргізіп келе жатып, бөтен аумақтағы шлагбаумды қасақана сындырып кеткен.

13 наурыз күні таңғы уақытта 62 жастағы тұрғын мас күйде сауда орталығындағы бутиктің кіреберіс есігін таяқпен зақымдаған. Сондай-ақ ол дүкендердің терезелерін, жиһаздар мен тауарларды сындырып кеткен. Материалдық шығын көлемі шамамен 300 мың теңгені құрады.

14 наурыз күні сағат 03:00 шамасында қаладағы қонақүйлердің бірінде 25 жастағы жігіт мас күйде әйел адаммен жанжалдасып, телефонын еденге лақтырып, сындырып тастаған.Тәртіп бұзушылар табылып, әкімшілік жауапкершілікке тартылды. 2025 жылдың басынан бері сот бөтеннің мүлкіне қасақана зиян келтіргені, қоғамдық орындарды ластағаны, ғимараттар мен тұрғын үй-жайларды бүлдіргені үшін 50 адамды жазалады.

Прокуратура елорда тұрғындары мен қонақтарына егер әрекетінде қылмыстық құқық бұзушылық белгілері болмаса, бөтеннің мүлкін қасақана сындырып кеткені үшін 60 АЕК мөлшерінде айыппұл салуға немесе 30 тәулікке дейін қамауға алуға әкеп соғатынын ескертеді.

Бұл оқиғалар елордадағы вандализмге қарсы кешенді шаралардың бір бөлігі болып саналады. Полицейлер қаладағы тәртіп пен тазалықты сақтауға, қоғамға жат әрекеттердің алдын алуға бағытталған профилактикалық жұмыстарды белсенді жүргізіп жатыр. Акцияның мақсаты – кез келген бұзақылық жағдайларды тоқтату және елордада тазалық пен тәртіпті сақтау.

Ақпарат көзі: ГУ «Аппарат акима города Астана»