Түркістан облысының әкімі Нұралхан Көшеровтің аудан, қала тұрғындарымен кездесулері мен жеке қабылдаулары жалғасуда. Бұл жолы кезекті кездесу Шардара ауданында өткізілді. Ауданды дамыту жолдары сараланып, тұрғындардың өтініштері мен ұсыныстары тыңдалды. Облыс әкімі аймақтың экономикалық және туристік әлеуеті жоғары екенін айтты. Жауаптыларға тиісті тапсырмалар берді.

– Мемлекет басшысы Үкіметтің кеңейтілген отырысында экономиканы әртараптандыру, инфрақұрылымды дамыту, ауыл шаруашылығы саласының әлеуетін арттыру бойынша нақты тапсырмалар берген болатын. Осы міндеттерді орындау үшін баршамыз бірлесе еңбек етуіміз қажет. Шардара ауданында іске асырылып жатқан мемлекеттік жобалар мен бағдарламаларға қысқаша тоқталсақ, «Ауыл – Ел бесігі» жобасы аясында Шардара ауданында 2024 жылы 4 елді мекенде құны 798,2 млн. теңгені құрайтын 7 жоба іске асырылды. Нәтижесінде 24 көшеге орташа жөндеу жұмыстары жүргізіліп, бір елді мекені табиғи газға қосылды. «Ауыл аманаты» жобасы аясында өткен жылы 67 млн. теңгеге 9 жоба қаржыландырылса, биыл 663 млн. теңгеге 113 жобаны қаржыландыру жоспарланып отыр. «Дипломмен ауылға» бағдарламасы аясында 8 маманға 3 млн. теңге көлемінде бірреттік көтерме жәрдемақы берілді. «Жайлы мектеп» жобасы аясында 1 мектеп тапсырылды. Жалпы өңірлік өнім көлемі 8 пайызға, шағын және орта бизнес субъектілерінің саны 5 пайызға өсті. Ауыл шаруашылығы өнімінің көлемі 9,8 пайызға ұлғайды. Дегенмен Шардараның туристік және экономикалық әлеуеті өте жоғары. Инвестиция тартуға да мүмкіндік бар. Осы бағытта жұмысты күшейту керек, – деген Нұралхан Көшеров биыл да ауданды дамыту жұмысы қарқынды түрде жалғасатынын жеткізді.

2025 жылы Шардара ауданындағы 4 елді мекенде «Ауыл – Ел бесігі» жобасы аясында құны 1 млрд. теңгені құрайтын 5 жоба жүзеге асырылады. Шардара және Алатау батыр елді мекендерінде 15 көшеге орташа жөндеу жұмыстары жүргізіледі. Әлеуметтік нысандар салынады. Мектептер жөнделеді.

Аудан әкімі Арман Қарсыбаев өткен жылы атқарылған жұмыстар мен алдағы жоспарларға тоқталды.

Кездесуде тұрғындар ағын су, тариф, тұрғын үй, мектеп, инфрақұрылым және өзге де мәселелерді қозғады. Облыс әкімі тарапынан тиісті жауаптар беріліп, түйткілдер бақылауға алынды.

Жеке қабылдауда да өзекті мәселелер көтерілді. Атап айтсақ, «Ауыл аманаты» жобасы бойынша қолдау көрсету, туризм, мақта шаруашылығын дамыту, мектепті күрделі жөндеуден өткізу, ауылдың инфрақұрылымдық мәселелерін шешу үшін нақты жоспар бекіту, шаруа қожалығын жүргізуге жер бөлу, ауыз су және кәріз жүйесіне қатысты өтініштер мен ұсыныстар айтылды. Олардың бірқатары шешімін тапса, уақытты талап ететіндері Нұралхан Көшеровтің бақылауына алынып, жауаптыларға тиісті тапсырмалар берілді. Түркістан облысы әкімінің баспасөз қызметі

Ақпарат көзі: ГУ "Аппарат акима Туркестанской области"